ملک میں پیٹرولیم مصنوعات کے ذخائر کافی ہیں، علی پرویز ملک

اسلام آباد (این این آئی)وفاقی وزیر پٹرولیم علی پرویز ملک نے کہا ہے کہ ملک میں پیٹرولیم مصنوعات کے ذخائر کافی ہیں۔خطے کی صورتحال کے تناظر میں پٹرولیم مصنوعات پر نجی ٹی وی سے گفتگو کرتے ہوئے انہوں نے کہاکہ وزیراعظم شہباز شریف نے صورتحال کے پیش نظر وزیر خزانہ کی قیادت میں پیٹرولیم مصنوعات کے جائزے کی ایک کمیٹی تشکیل دی ہے۔علی پرویز ملک نے کہاکہ اس کمیٹی کا میں حصہ ہوں، اوگرا چئیرمن، سیکٹری پیٹرولیم اور دیگر افسران بھی شامل ہیں، روزانہ کی بنیاد پر پیٹرولیم سٹاک کا جائزہ لے کر ضروری ہدایات جاری کرتے ہیں۔ انہوں نے کہاکہ وزارت پیٹرولیم میں جائزہ اجلاس لیا ہے، ملک میں پیٹرولیم مصنوعات کے ذخائر کافی ہیں۔علی پرویز ملک نے کہاکہ اوگرا ریفائنری اور آئل مارکٹنگ کمپنیوں کے سٹاک کی مانیٹرنگ کر رہا ہے، خدانہ خواستہ آبنائے ہرمز کی بندش کی صورت میں سپلائی مینیج کرنے کا جائزہ لیا گیا ہے۔ علی پرویز ملک نے کہاکہ پیٹرولیم مصنوعات کی سپلائی چین فعال رکھنے کی آخری حد تک کوشش کریں گے۔انہوں نے کہاکہ وزیراعظم آنے والے دنوں میں خود بھی جائزہ اجلاس لیں گے۔