لاہور (این این آئی) وزیر تعلیم پنجاب رانا سکندر حیات کی زیر صدارت لاہور ڈویژن کے ضلعی تعلیمی افسران کا اجلاس منعقد ہوا جس میں انہوں نے سی ای اوز، ڈی ای اوز، ڈپٹی تعلیمی افسران اور اے ای اوز کو سکولوں کی بہتری اور سہولیات کا فقدان دور کرنے کے حوالے سے ہدایات دیتے ہوئے کہا کہ میرا ٹارگٹ ہے ہر ضلع میں 100 ایسے سرکاری معیاری سکول ہوں جہاں داخلوں کیلئے ویٹنگ لسٹ ہو۔ اساتذہ میرے ساتھ ملکر تعلیمی نظام کو درست خطوط پر استوار کریں اور ایسا تعلیمی نظام بنائیں کہ آپ خود بھی سرکاری سکولوں پر اعتماد کرتے ہوئے اپنے بچے وہاں پڑھانے کو ترجیح دیں۔ نتائج نہ آئے تو مزید سکولوں کی آٹ سورسنگ کے سوا کوئی چارہ نہیں۔ وزیر تعلیم نے کہا کہ اب تک جو سکول آٹ سورس کئے ہیں، آٹ سورسنگ کے بعد ان کی کوالٹی اور نتائج میں اضافہ ہوا ہے اور یہ ایک کامیاب تجربہ رہا ہے۔ وزیر تعلیم نے کہا کہ سکولوں کیلئے ریسورسز کے حصول کیلئے میرے دروازے پر وقت کھلے ہیں۔ تمام ایجوکیشن افسران سہولیات کا فقدان فوری دور کریں۔ آئندہ 2 ہفتوں میں تمام سکولوں کو فنڈز ٹرانسفر ہو جائیں گے۔ وزیر تعلیم نے کہا کہ لاہور بڑا ضلع ہے، سکولوں کی بہتری حوالے سے لاہور کا لیڈنگ رول ہونا چاہئے۔ کمپیوٹر و سائنس لیبز فوری فنکشنل کریں، ہائیر سیکنڈری سکولوں میں سٹیم ایجوکیشن پر فوکس کریں اور ایجوکیشن کی کوالٹی بڑھانے پر توجہ دیں۔ رانا سکندر حیات نے تمام تعلیمی افسران کو واضح پیغام دیا کہ کرپشن، غفلت اور اساتذہ کی غیر حاضریوں کا سلسلہ اب بند ہونا چاہئے۔ سکولوں کے اچانک دورے کروں گا اور کسی قسم کی کوتاہی ناقابل معافی ہوگی۔ رانا سکندر حیات نے مزید کہا کہ اس سال سے اساتذہ کی ہولیو سمیت دیگر اضافی ڈیوٹیاں ختم کر دی۔ اساتذہ اب صرف تدریس پر فوکس کریں اور طلبا کو ٹیکنالوجی اور جدید رجحانات سے آگاہ کریں۔
میرا ہدف، ہر ضلع میں 100معیاری سرکاری سکول، جن میں داخلے کیلئے ویٹنگ لسٹ ہو‘ وزیر تعلیم
