لاہور ہائیکورٹ نے جڑانوالہ میں میونسپل کمیٹی کی دکانوں کی نیلامی روک دی

لاہور(این این آئی) لاہور ہائیکورٹ نے جڑانوالہ میں میونسپل کمیٹی کی دکانوں کی نیلامی روک دی۔منگل کوعدالت کے روبرو درخواست گزاروں کی طرف سے چودھری شعیب سلیم ایڈووکیٹ نے دلائل دیئے، درخواست میں ڈپٹی کمشنر فیصل آباد، اسسٹنٹ کمشنر فیصل آباد، میونسپل کمیٹی اور دیگر کو فریق بنایا گیا۔درخواست گزاروں نے کہا کہ 2024 میں میونسپل کمیٹی کی جانب سے دکانوں کی نیلامی پانچ سال کیلئے کی گئی تھی، لیکن حال ہی میں ڈپٹی کمشنر نے دوبارہ ان دکانوں کی نیلامی کیلئے اشتہار جاری کر دیا۔درخواست میں موقف اختیار کیا گیا کہ لوکل گورنمنٹ ایکٹ کے تحت انتظامیہ پانچ سال سے قبل دکانوں کی نیلامی نہیں کر سکتی، عدالت جڑانوالہ میں 25 جولائی کو دکانوں کی نیلامی روکنے کا حکم دے اور ڈپٹی کمشنر فیصل آباد کا دوبارہ نیلامی کا نوٹیفکیشن کالعدم قرار دے۔لاہور ہائیکورٹ نے فوری طور پر 25 جولائی کو جڑانوالہ میں ہونے والی نیلامی روکنے کا حکم جاری کر دیا۔