اٹیچڈ ڈ یپارمنٹ آفیسرز ایسوسی ایشن کا محکمہ لیبر اینڈ مین پاور میں ہونیوالے بھرتی عمل پر اظہار تشویش

کوئٹہ(این این آئی)اٹیچڈ ڈیپارٹمنٹ آفیسرز ایسوسی ایشن کی جانب سے محکمہ لیبر اینڈ مین پاور میں ہونے والے بھرتی کے عمل پر شدید تشویش کا اظہار کیا گیا ہے۔ ایسوسی ایشن کا کہنا ہے کہ اس بھرتی کے عمل میں نہ صرف زونل کوٹے، خواتین اور معذور افراد کے کوٹے کی منصفانہ تقسیم کو نظر انداز کیا گیا ہے بلکہ اس کی مکمل شفافیت پر بھی سوالات اٹھتے ہیں۔ایسوسی ایشن کے مطابق ریکروٹمنٹ کمیٹی کی تشکیل بھی قواعد و ضوابط کے برعکس کی گئی ہے۔ اس کمیٹی میں وہ افراد شامل کیے گئے ہیں جو مخصوص پسند و ناپسند کی بنیاد پر منتخب کیے گئے، جو کہ ایس اینڈ جی اے ڈی کے طے شدہ طریقہ کار کی صریح خلاف ورزی ہے۔ایسا بھرتی عمل نہ صرف نوجوان پڑھے لکھے افراد کے لیے مایوسی کا باعث ہے بلکہ اس سے معاشرے میں بے چینی اور عدم اطمینان بھی جنم لے گا۔ اس قسم کی غیر منصفانہ پالیسیوں سے نوجوان طبقے کا اعتماد ختم ہو گا اور وہ اپنے مستقبل کے بارے میں غیر یقینی کا شکار ہوں گے۔اٹیچڈ ڈیپارٹمنٹ آفیسرز ایسوسی ایشن چیف منسٹر اور چیف سیکریٹری بلوچستان سے پْر زور اپیل کرتی ہے کہ وہ اس بھرتی کے عمل کا ذاتی طور پر جائزہ لیں اور اس بات کو یقینی بنائیں کہ بھرتی کا پورا عمل میرٹ، شفافیت اور قوانین کے عین مطابق ہو تاکہ اہل امیدواروں کو ان کا جائز حق مل سکے اور معاشرے میں انصاف اور برابری کا پیغام جائے۔