آپریشن بنیان المرصوص کی کامیابی کے بعد اس جشن آزادی کا مزہ دوبالا ہو گیا‘ عظمیٰ بخاری

لاہور (این این آئی) وزیر اطلاعات پنجاب عظمیٰ بخاری نے کہا ہے کہ آپریشن بنیان المرصوص کی کامیابی کے بعد اس جشن آزادی کا مزہ دوبالا ہو گیا۔وزیر اطلاعات پنجاب عظمی بخاری نے یومِ آزادی کے موقع پر قوم کے نام اپنے پیغام میں کہا کہ 14اگست کا دن ہمیں اللہ تعالی کی اس عظیم نعمت کی یاد دلاتا ہے جو ہمیں شہدا کی قربانیوں اور لاکھوں مسلمانوں کی ہجرت کے بعد حاصل ہوئی۔ان کا کہنا تھا کہ یومِ آزادی اللہ تعالی کا شکر بجا لانے کا تقاضا کرتا ہے، ہمیں یاد رکھنا چاہئے کہ یہ ملک بڑی قربانیوں کے بعد حاصل ہوا ہے اور ہمیں اسے ایمان، اتحاد اور قربانی کے جذبے سے سنوارنا ہے۔عظمیٰ بخاری نے بنیان المرصوص آپریشن میں حالیہ کامیابی کو بھی قوم کے لئے باعثِ فخر قرار دیا اور کہا کہ ملکی دفاع میں حاصل کی گئی یہ اہم کامیابی اس سال کے جشنِ آزادی کو مزید معنی خیز اور پرمسرت بنا رہی ہے۔عوام سے خصوصی اپیل کرتے ہوئے عظمی بخاری نے کہا کہ جشنِ آزادی ضرور منائیں، خوشی منائیں لیکن ذمہ داری کے ساتھ، زمین پر گری ہوئی جھنڈیاں اٹھائیں کیونکہ ہمارا پرچم ہماری پہچان ہے، اپنی پہچان کو پاؤں تلے مت روندیں۔