پاکستان پیپلز پارٹی سیکرٹری جنرل محمد ہمایوں خان سے پارٹی رہنماؤں کی ملاقات،پارٹی کی تنظیمی صورتحال، آئندہ انتخابات کی تیاریوں پر گفتگو

اسلام آباد (این این آئی)پاکستان پیپلز پارٹی سیکرٹری جنرل محمد ہمایون خان سے ممبر پنجاب کونسل چوہدری بنارس، ضلع اورکزئی صدر اقبال حسین نے ملاقات کی،اس موقع پر علی اعوان، منور زاد خان ایڈووکیٹ، دلنواز خان سمیت پارٹی کے سینئر رہنما بھی موجود تھے۔ ملاقات میں پارٹی کی تنظیمی صورتحال، آئندہ انتخابات کی تیاریوں، اور موجودہ سیاسی و معاشی حالات پر تفصیلی تبادلہ خیال کیا گیا۔ہمایوں خان نے میں پارٹی کی عوامی رابطہ مہم کو مزید مؤثر بنانے، کارکنوں کو متحرک رکھنے، اور نوجوانوں کو سیاسی عمل میں شامل کرنے کے حوالے سے مختلف تجاویز پیش کی۔ محمد ہمایوں خان نے پارٹی رہنماؤں کو ہدایت کی کہ وہ عوامی مسائل کے حل کے لیے متحرک کردار ادا کریں اور پارٹی کے نظریات کو گراس روٹ سطح تک پہنچانے کے لیے اپنا کردار ادا کریں۔ہمایوں خان نے کہاکہ پاکستان پیپلز پارٹی ایک جمہوری جماعت ہے جو ہمیشہ عوامی خدمت اور شفاف سیاست پر یقین رکھتی ہے، ہر سطح پر پارٹی کو مضبوط بنانے کے لیے اپنا کردار ادا کرتے رہیں گے۔