بلوچستان عوامی پارٹی کی خواتین ونگ کی مرکزی سیکرٹری جنرل روبینہ عرفان کا پارٹی سے استعفیٰ دینے کا اعلان

کوئٹہ(این این آئی)بلوچستان عوامی پارٹی کی خواتین ونگ کی مرکزی سیکرٹری جنرل و سابق رکن قومی اسمبلی روبینہ عرفان نے پارٹی سے استعفیٰ دینے کا اعلان کردیا۔ اتوار کو روبینہ عرفان کی جانب سے بلوچستان عوامی پارٹی کے مرکزی صدر نوابزادہ خالد مگسی کو لکھے گئے استعفے کے متن میں کہا ہے کہ مجھے بلوچستان عوامی پارٹی کیلئے کام کرنے کا اعزاز حاصل رہا ہے لیکن اب میرے ذاتی نظریات اور پارٹی کی سمت میں واضح تبدیلی آگئی ہے جس کی وجہ سے میں بی اے پی سے استعفیٰ دینے کا اعلان کرتی ہوں اس حوالے سے رابطہ کرنے پر روبینہ عرفان نے بی اے پی سے مستعفی ہونے کی تصدیق کرتے ہوئے بتایا کہ انہوں نے بلوچستان عوامی پارٹی سے استعفیٰ دیدیا ہے لیکن وہ بلوچستان اور یہاں کے عوام کیلئے ہمیشہ جدوجہد کرتی رہیں گی انہوں نے کہا کہ میرے اپنے اصول اور نظریات ہیں جن پر آج بھی قائم ہوں۔