اوتھل میونسپل کمیٹی کے ملازمین تین ماہ سے تنخواہوں سے محروم

لسبیلہ(بیورو چیف حفیظ دانش) میونسپل کمیٹی اوتھل کے ملازمین گزشتہ تین ماہ سے تنخواہوں سے محروم ہیں، جس کے باعث ان کے گھروں کے چولہے ٹھنڈے پڑ گئے ہیں اور ملازمین نانِ شبینہ کے محتاج ہو چکے ہیں۔ تنخواہوں کی عدم ادائیگی سے ملازمین کے گھریلو حالات بدترین صورت اختیار کر چکے ہیں، جبکہ کئی بار احتجاج اور دھرنے بھی دیے گئے، لیکن متعلقہ اداروں کی جانب سے اب تک کوئی عملدرآمد نہ ہوسکا۔متاثرہ ملازمین کا کہنا ہے کہ وہ شدید مالی بحران کا شکار ہو چکے ہیں اور ان کے بچوں کی تعلیم، علاج اور روزمرہ ضروریات بری طرح متاثر ہو رہی ہیں۔ ملازمین نے وزیراعلیٰ بلوچستان میر سرفراز بگٹی اور وزیر بلدیات سے فوری مداخلت کی اپیل کرتے ہوئے مطالبہ کیا ہے کہ ان کی واجب الادا تنخواہیں جلد از جلد جاری کی جائیں تاکہ وہ اپنی زندگی معمول کے مطابق گزار سکیں۔