کوئٹہ(این این آئی) خضدار میں لیویز اہلکاروں کے خلاف کاروائی دو نائب رسالداروں کو تین رینک تنزلی کے بعد سپاہی بنا دیا گیا۔تفصیلات کے مطابق ڈپٹی کمشنر خضدار یاسر اقبال دشتی نے منشیات اسمگلنگ کے مقدمات میں مجرمانہ غفلت، ناقص تفتیش اور اسمگلرز سے مبینہ روابط کے الزامات پر لیویز فورس کے دو نائب رسالداروں کے خلاف بڑی تادیبی کاروائی عمل میں لاکر ایس ایچ او باغبانہ نائب رسالدار غلام حیدر،ایس ایچ او وڈھ آڑنجی نائب رسالدار مختیار احمد کو منشیات کیسز میں ملزمان کو فائدہ پہنچانے، ناقص تفتیش اور اختیارات کے غلط استعمال پر قصوروار ٹھہراتے ہوئے انکے خلاف سخت کاروائی کا فیصلہ کیا۔دونوں افسران کو تین رینک تنزلی دے کر سپاہی بنا نے کے ساتھ ساتھ،سینارٹی لسٹ میں آخری نمبر،پانچ سال تک ترقی پر مکمل پابندی عائد اور پانچ سال تک کسی نئی پوسٹنگ کے لیے نا اہل قرارد ے دیا ہے۔ ڈپٹی کمشنر خضدار نے واضح الفاظ میں کہا ہیکہ لیویز فورس انصاف پسند، قانون کی پابند اور عوام کی محافظ فورس ہے۔ ایسے اہلکار جو منشیات فروشوں یا جرائم پیشہ عناصر سے روابط رکھتے ہوں، ان کے لیے اس فورس میں کوئی جگہ نہیں۔ترجمان لیویز فورس خضدار کے مطابق یہ سخت اقدام اس وقت اٹھایا گیا جب منشیات کے اہم مقدمات میں دونوں افسران کی ناقص تفتیش کے باعث ملزمان کو عدالت سے رہائی ملی۔ انکوائری میں یہ بات سامنے آئی کہ دونوں افسران نے مجرمان کے ساتھ ملی بھگت کرتے ہوئے جان بوجھ کر شواہد کو کمزور کیا۔شہریوں، سول سوسائٹی اور دیگر اداروں نے اس اقدام کو سراہا ہے اور اسے قانون کی عملداری اور لیویز فورس میں احتساب کے عمل کو مضبوط بنانے کی جانب ایک مثبت قدم قرار دیا ہے۔
خضدار،لیویز اہلکاروں کے خلاف کاروائی دو نائب رسالداروں کو تین رینک تنزلی کے بعد سپاہی بنا دیا گیا
