بچے ہمارا مستقبل،خوشی، سہولت اور کامیابی ہی ہمارے روشن کل کی ضمانت ہے،بریگیڈئیر عامر خان خلیل

نوکنڈی (این این آئی) تفتان رائفلز ایف سی بلوچستان ساؤتھ کے کمانڈنٹ برگیڈیئر عامر خان خلیل نے ایک سادہ اور پروقار تقریب میں خدمتِ انسانیت اور تعلیم دوستی کا عملی مظاہرہ کرتے ہوئے گورنمنٹ گرلز ہائیر سیکنڈری سکول نوکنڈی اور ایف سی پبلک اسکول اینڈ کالج نوکنڈی کے غریب و نادار طلباء و طالبات میں اسکول یونیفارمز اور شوز تقسیم کیے۔ برگیڈیئر عامر خان خلیل نے اس موقع پر خطاب کرتے ہوئے کہا کہ تعلیم ہی وہ واحد ذریعہ ہے جس کے ذریعے قومیں ترقی کرتی ہیں اور معاشرے روشنی کی طرف گامزن ہوتے ہیں۔ انہوں نے کہا کہ یہ بچے ہمارا سرمایہ اور مستقبل ہیں، ان کی خوشی، سہولت اور کامیابی ہی ہمارے روشن کل کی ضمانت ہے۔ انہوں نے مزید کہا کہ ایف سی بلوچستان نہ صرف سرحدوں کی حفاظت کے لیے کوشاں ہے بلکہ عوامی خدمت اور تعلیم کے فروغ کے میدان میں بھی اپنی ذمے داریاں احسن انداز میں ادا کر رہی ہے۔ مقامی اساتذہ اور والدین نے برگیڈیئر عامر خان خلیل کے اس اقدام کو بچوں کی حوصلہ افزائی اور تعلیمی میدان میں یکساں مواقع فراہم کرنے کی بہترین مثال قرار دیا۔ انہوں نے کہا کہ اس طرح کی عملی کوششوں سے نہ صرف طلباء و طالبات میں اعتماد پیدا ہوگا بلکہ وہ اپنی تعلیمی کارکردگی کو مزید بہتر بنانے کی جانب راغب ہوں گے۔ آخر میں برگیڈیئر عامر خان خلیل نے دعا کی کہ یہ معصوم بچے علم کی روشنی سے اپنے علاقے اور ملک کا نام روشن کریں اور مستقبل میں وطن کے شاندار معمار بنیں۔