پیپلز پارٹی عوام کی حقیقی نمائندہ جماعت ہے، میر مرتضیٰ خان جمالی

گنداخہ (نامہ نگار) پاکستان پیپلز پارٹی نصیرآباد ڈویژن کے سینئر نائب صدر میر مرتضیٰ خان جمالی نے کہا ہے کہ پاکستان پیپلز پارٹی عوام کی نمائندہ جماعت ہے اور ہمیشہ سے عوامی مسائل کے حل کیلئے جدوجہد کرتی رہی ہے۔ انہوں نے کہا کہ بلوچستان کے عوام کی امیدیں آج بھی پیپلز پارٹی سے وابستہ ہیں کیونکہ یہ جماعت ہر طبقے کی آواز بن کر ابھری ہے اپنے جاری کردہ ایک بیان میں میر مرتضیٰ جمالی کا کہنا تھا کہ پیپلز پارٹی بلوچستان میں ایک جامع اور بہتر حکمت عملی کے تحت عوامی رابطہ مہم چلا رہی ہے تاکہ محروم طبقات کو ان کے حقوق دلائے جا سکیں۔ انہوں نے کہا کہ پارٹی چیئرمین بلاول بھٹو زرداری کی قیادت میں پاکستان پیپلز پارٹی ملک بھر میں سیاسی بیداری، جمہوریت کے استحکام اور عوامی فلاح و بہبود کیلئے کلیدی کردار ادا کر رہی ہے انہوں نے مزید کہا کہ بلوچستان جیسے پسماندہ صوبے میں ترقی، تعلیم، صحت اور روزگار جیسے بنیادی مسائل کے حل کیلئے پیپلز پارٹی نے ہمیشہ آواز بلند کی ہے اور آئندہ بھی کرتی رہے گی۔ میر مرتضیٰ جمالی نے کارکنان پر زور دیا کہ وہ پارٹی کے پیغام کو ہر گھر تک پہنچائیں اور عوامی رابطوں کو مزید مضبوط کریں۔انہوں نے کہا کہ وقت آگیا ہے کہ عوام پرانے نعروں سے دھوکہ کھانے کے بجائے ایک حقیقی عوامی جماعت کا ساتھ دیں تاکہ بلوچستان میں پائیدار ترقی کی راہ ہموار ہو سکے.