پسند کی شادی کرنے والا جوڑا تحفظ کیلئے اوتھل پریس کلب پہنچ گیا

اوتھل(این این آئی) سندھ کے علاقے سامارو سے تعلق رکھنے والے جوڑے مان سنگھ اور مسمات پریمی نے باہمی رضامندی سے گزشتہ روز حیدرآباد سندھ کی عدالت میں شادی کرلی اور ارما بیل پریس کلب اوتھل لسبیلہ بلوچستان میں پریس کانفرنس کرتے ہوئے کہا کہ شادی کے بعد ان کی زندگی کو شدید خطرات لاحق ہو گئے ہیں۔انہوں نے کورٹ میرج کا ثبوت صحافیوں کو دکھاتے ہوئے کہا کہ انہیں مسمات پریمی کے سابق شوہر میگراج، پرکو کوہلی، پپن، اور ٹھاکر سی کوہلی کی طرف سے جان سے مارنے کی دھمکیاں دی جا رہی ہیں۔ پریمی جوڑے نے بتایا کہ وہ عاقل بالغ ہیں اور اپنی مرضی سے شادی کر چکے ہیں، مگر طاقتور لوگ انہیں غیرت کے نام پر قتل کرنا چاہتے ہیں۔ سندھ میں انہیں کوئی تحفظ نہیں مل رہا، اس لیے وہ بلوچستان کا رخ کرکے اوتھل پہنچے تاکہ اپنی جان بچا سکیں۔انہوں نے وزیر اعلیٰ بلوچستان، وزیر اعلیٰ سندھ، آئی جی پولیس سندھ و بلوچستان، اور انسانی حقوق کی تنظیموں سے فوری اور مؤثر مداخلت کر کے مکمل تحفظ کی فراہمی کا مطالبہ کیا ہے۔