مختلف علاقوں میں بجلی لائنوں سے سامان،تاریں چوری کے باعث بجلی فراہمی معطل ہونے کیساتھ کیسکو کو مالی نقصان کا سامنا ہے، ترجمان

کوئٹہ(این این آئی) کوئٹہ الیکٹرک سپلائی کمپنی(کیسکو) کے ترجمان نے کہاہے کہ صوبہ کے مختلف علاقوں میں تواترکے ساتھ ایک منظم گروہ بجلی لائنوں سے سامان اور تاریں چوری کررہے ہیں جسکے نتیجے میں بجلی کی فراہمی معطل ہونے کے ساتھ ساتھ کیسکوکومالی نقصان کاسامناکرناپڑرہاہے۔ ترجمان نے کہاکہ گزشتہ دنوں قلات کے علاقہ میں لیویز حکام نے بجلی کے کھمبوں سے تاریں چوری کے واقعہ کی اطلاع پرکارروائی کرتے ہوئے ایک شخص کوموٹرسائیکل سمیت گرفتارکرلیا جسکے قبضہ سے 160رول بجلی کی تاریں برآمدکرلی گئیں جبکہ 2ملزمان رات کی تاریکی کافائدہ اُٹھاتے ہوئے موقع سے فرارہونے میں کامیاب ہوگئے۔ترجمان نے مزید کہاکہ کچلاک کے علاقہ بوستان کے قریب بھی 11Kvعمرآبادفیڈرسے بجلی کی تاریں اورکنڈکٹر ز چوری کرنے کے دوران لیویز نے بروقت کارروائی کرکے شخص کو رنگے ہاتھوں گرفتارکرلیا جنکے قبضے سے چوری شدہ کنڈکٹر (تقریباً 27 اسپین)بھی برآمدکرلئے گئے جبکہ اس واقعہ میں ملوث 2افراد موقع سے فراربھی ہوگئے۔ترجمان نے مزیدکہاکہ ایک اور واقعہ میں نامعلوم چوروں نے کھڈکوچہ کے علاقہ میں بھی45سے زائد کھمبوں سے بجلی کی تاریں کاٹ کرچرالئے، اسکے علاوہ گزشتہ دنوں لک پاس کے قریب بھی چوری شدہ بجلی تاروں اور دیگربرقی سامان سے لوڈایک ٹرک پکڑاگیاجسے مقامی انتظامیہ نے اپنی تحویل میں لے کرملوث عناصرکے خلاف تحقیقات اور مزید قانونی کارروائی عمل میں لائی جارہی ہے۔ کیسکونے تمام صارفین سے اپیل کی ہے کہ وہ اپنے اردگرد بجلی کی لائنوں اورکھمبوں کی حفاظت کیلئے کیسکوسے تعاون کریں۔