ماحولیاتی تحفظ،پائیداری انسانی بقا ء کیلئے نہایت اہم ہے،ڈاکٹر خالد حفیظ

کوئٹہ(این این آئی)ماحولیاتی تحفظ اور پائیداری انسانی بقا کے لیے نہایت اہم ہے, جامعات ماحول کے تحفظ اور بین الاقوامی ماحولیاتی اہداف کے حصول میں کلیدی کردار ادا کر سکتی ہیں۔ تحقیقی سرگرمیوں سے موسمیاتی و ماحولیاتی تبدیلی اوران کے معاشرے پر اثرات پر آگاہی ہماری مشترکہ ذمہ داری ہے۔ ان خیالات کا اظہار وائس چانسلر بلوچستان یونیورسٹی آف انفارمیشن ٹیکنالوجی انجینئرنگ اینڈ منیجمنٹ سائنسز پروفیسر ڈاکٹر خالد حفیظ نے جامعہ میں نیشنل اوزون یونٹ (NOU)، وزارتِ موسمیاتی تبدیلی و ماحولیاتی ہم آہنگی کی جانب سے عالمی یومِ تحفظِ اوزون 2025 کے موقع پرمنعقدہ سیمینار سے خطاب کرتے ہوئے کیا۔ انہوں نے کہا کہ ماحولیاتی تحفظ کے لئے بیوٹمز اپنی تمام تحقیقی و تعلیمی صلاحیتوں بروئے کار لائے گی اور وزارتِ موسمیاتی تبدیلی و ماحولیاتی ہم آہنگی کے تعاون اور تکنیکی معاونت سے اپنا بھرپور کردار ادا کرے گی۔ چیف نیشنل اوزون یونٹ ڈاکٹر سلیم جنجوعہ نے تقریب سے خطاب کرتے ہوئے کہا کہ جامعات اوزون سے نقصان دہ مادوں کے خاتمے اور ماحولیاتی اہداف حاصل کرنے میں اہم کردار ادا کر سکتی ہیں یہی وجہ ہے کہ جامعات کے ساتھ تعلق اور ربط ہماری ترجیح ہیں اور تعلیمی اداروں کے ساتھ مضبوط شراکت داری اور مشترکہ کاوشوں کے ذریعے عالمی اہداف کی تکمیل ممکن بنائی جا سکتی ہے۔تقریب میں رجسٹرار بیوٹمز احسن اچکزئی سمیت اساتذہ، محققین اور طلباء کی بڑی تعداد نے شرکت کی۔