اسسٹنٹ کمشنر ڈیرہ بگٹی کا محلہ سہر میں واٹر سپلائی سکیم کا دورہ، غیر قانونی کنکشن منقطع

ڈیرہ بگٹی (این این آئی)اسسٹنٹ کمشنر ڈیرہ بگٹی حسنین احمد نے محلہ سہر میں واٹر سپلائی اسکیم کا تفصیلی دورہ کیا۔ اس موقع پر سب انجینئر محکمہ پی ایچ ای بھی ان کے ہمراہ موجود تھے۔دورے کے دوران اسسٹنٹ کمشنر نے پانی کی مین لائن میں متعدد غیر قانونی کنکشنز کی نشاندہی کی، جس پر انہوں نے فوری طور پر کارروائی کرتے ہوئے تمام غیر قانونی لائنیں کاٹنے کے احکامات جاری کیے۔اسسٹنٹ کمشنر حسنین احمد نے محلہ مکینوں کو واضح طور پر ہدایت کی کہ آئندہ اگر کسی نے مین لائن پر غیر قانونی کنکشن لگانے کی کوشش کی تو اس کے خلاف سخت قانونی کارروائی عمل میں لائی جائے گی۔انہوں نے کہا کہ انتظامیہ کا مقصد عوام کو صاف اور منصفانہ پانی کی فراہمی یقینی بنانا ہے، اور اس ضمن میں کسی بھی قسم کی غیر قانونی مداخلت برداشت نہیں کی جائے گی۔عوامی حلقوں نے اسسٹنٹ کمشنر کے اقدام کو قابلِ تعریف قرار دیتے ہوئے کہا کہ ان کے اس عمل سے پانی کی فراہمی کا نظام بہتر ہوگا۔مزید برآں، عوام نے ڈپٹی کمشنر ڈیرہ بگٹی زویب کی بہترین انتظامی کارکردگی، عوامی مسائل میں گہری دلچسپی اور مؤثر نگرانی کو بھی زبردست الفاظ میں سراہا۔ ان کی قیادت میں ڈیرہ بگٹی کی ضلعی انتظامیہ عوامی خدمت کے جذبے کے ساتھ دن رات سرگرم عمل ہے۔