تمپ سے بڑی تعداد میں کارکنان کی نیشنل پارٹی میں شمولیت، میر کبیر کا خیرمقدم

کوئٹہ( این این آئی) کارکنان نیشنل پارٹی کا سب سے بڑا سرمایہ ہیں’ تمپ سے بڑی تعداد میں سیاسی کارکنان کی پارٹی میں شمولیت خوش آئند ہے’ جدوجہد کو مزید تقویت ملے گی، میر کبیر محمدشہی نیشنل پارٹی کے مرکزی سیکرٹری جنرل میر کبیر احمد محمدشہی نے تمپ کے مختلف علاقوں سے سیاسی کارکنان اور علاقائی عمائدین کی نیشنل پارٹی میں شمولیت کو خوش آئند قرار دیتے ہوئے انہیں پارٹی میں خوش آمدید کہا ہے۔ میر کبیر نے کہا ہے کہ نیشنل پارٹی مخلص اور باشعور سیاسی کارکنان پر مشتمل جمہوری سیاسی جماعت ہے اور کارکنان پارٹی کا سب سے بڑا سرمایہ ہیں۔ نیشنل پارٹی محکوم اقوام اور مظلوم عوام کی محرومیوں کو دور کرنے اور ان کے حق حکمرانی کے حصول کےلیے کوشاں ہے اور اسی لیے ملک میں حقیقی جمہوریت، پارلیمان کی بالادستی، آئین کی حکمرانی، سماجی انصاف اور ساحل و وسائل پر اقوام کا حق ملکیت قائم کرنے کے لیے جدوجہد کررہی ہے۔ حالیہ شمولیتوں سے ایک بار پھر یہ واضح ہوتا ہے کہ نیشنل پارٹی ہی عوام اور سیاسی کارکنوں کی امنگوں کی حقیقی ترجمان ہے۔ تمپ سے بڑی تعداد میں کارکنان کی پارٹی میں شمولیت پارٹی پر سیاسی کارکنان کی جانب سے اعتماد کا اظہار ہے اور اس سے پارٹی کی جمہوری جدوجہد کو مزید تقویت ملے گی۔