ڈپٹی کمشنر پنجگور کی دلچسپی کی بدولت پرانا ڈیزل منڈی روڈ کا طویل عرصے سے رکا ہوا کام جلد شروع ہوگا، فریداحمد

پنجگور(این این آئی)انجمن تاجران پنجگور کے صدر فرید احمد نے اپنے ایک بیان میں کہا ہے کہ ڈپٹی کمشنر پنجگور عبدالکبیر زرکون کی بھرپور دلچسپی اور انتھک کوششوں کے نتیجے میں پرانا ڈیزل منڈی روڈ کا طویل عرصے سے رکا ہوا کام اب جلد باقاعدہ طور پر شروع ہونے جا رہا ہے صدر انجمن تاجران نے کہا کہ ڈپٹی کمشنر پنجگور کی عوام دوست پالیسیوں اور ترقیاتی وژن نے یہ واضح کر دیا ہے کہ وہ پنجگور کی ترقی اور عوام کی فلاح و بہبود کے لیے سنجیدہ اور مخلص ہیں۔ ان کی شب و روز محنت، انتظامی صلاحیت، اور علاقے کے مسائل کے حل کے لیے عملی اقدامات قابلِ تعریف ہیں۔ پنجگور کی عوام اور تاجر برادری ان کی کارکردگی سے نہایت مطمئن اور خوش ہیں۔ ہم امید کرتے ہیں کہ ڈپٹی کمشنر جناب عبدالکبیر زرکون اسی جذبے کے ساتھ مزید ترقیاتی منصوبے شروع کریں گے اور پنجگور کو ایک مثالی ضلع بنانے میں کامیاب ہوں گیہم ایکسئین بی اینڈ آر اور مئیر میونسپل کارپوریشن پنجگور جناب میر شکیل احمد قمبرانی کے بھی شکر گزار ہیں جنہوں نے عوامی مشکلات کو مدنظر رکھتے ہوئے بروقت اقدامات کیے اور اپنا پلانٹ اسٹارٹ کروا کر اس اہم منصوبے کے آغاز کو ممکن بنایا۔ ان کا مثبت رویہ اور عوام دوست سوچ اس بات کا ثبوت ہے کہ وہ پنجگور کے بہتر مستقبل کے لیے مخلصانہ جذبہ رکھتے ہیں۔ ہمیں یقین ہے کہ وہ آنے والے وقت میں پنجگور کے لیے ایک بہترین اور مؤثر لیڈر ثابت ہوں گے۔انجمن تاجران پنجگور کے صدر فرید احمد نے پرانے ڈیزل منڈی روڈ کے قریب رہائش پذیر عوام اور دکانداروں کا بھی خصوصی شکریہ ادا کیا جنہوں نے عرصہ دراز تک صبر و تحمل سے مشکلات برداشت کیں۔ ان کا تعاون اور برداشت اس منصوبے کی تکمیل میں حوصلہ افزائی کا باعث ہے۔آخر میں انجمن تاجران پنجگور نے اْمید ظاہر کی کہ ٹھیکیدار حضرات تیزی اور معیار کے ساتھ کام مکمل کر کے تاجر برادری اور عوام کے دل جیت لیں گے۔