ڈسٹرکٹ چیئرمین خضدار حاجی صلاح الدین زہری کی ولید صالح بلوچ کے قتل کی شدید مذمت، رحمت بلوچ اور مالک بلوچ سے تعزیت کا اظہار

کوئٹہ (این این آئی) پاکستان پیپلز پارٹی کے رہنما اور ڈسٹرکٹ چیئرمین خضدار حاجی صلاح الدین زہری نے نیشنل پارٹی کے رہنما و رکن بلوچستان اسمبلی رحمت صالح بلوچ اور ڈسٹرکٹ چیئرمین پنجگور عبدالمالک بلوچ کے چھوٹے بھائی ولید صالح بلوچ کے قتل کی شدید الفاظ میں مذمت کی ہے اپنے ایک بیان میں حاجی صلاح الدین زہری نے کہا کہ بے گناہ افراد کو نشانہ بنانا ایک انتہائی بزدلانہ اور قابلِ افسوس عمل ہے، جس کی جتنی بھی مذمت کی جائے، کم ہے۔ انہوں نے کہا کہ دہشت گردی جیسے ناسور سے نمٹنے کے لیے ہمیں مشترکہ طور پر جدوجہد کرنا ہوگی انہوں نے مزید کہا کہ ایک سیاسی گھرانے سے تعلق رکھنے والے نوجوان کو نشانہ بنا کر شہید کرنا نہ صرف افسوسناک ہے بلکہ یہ عمل معاشرے میں بدامنی پھیلانے کی سازش کا حصہ معلوم ہوتا ہے۔ حاجی صلاح الدین زہری نے رحمت صالح بلوچ، عبدالمالک بلوچ اور ان کے خاندان سے ولید صالح بلوچ کی شہادت پر دلی تعزیت کا اظہار کرتے ہوئے مرحوم کے درجات کی بلندی اور لواحقین کے لیے صبرِ جمیل کی دعا کی۔