نیشنل پارٹی کی ولید صالح بلوچ کے قتل کی شدید مذمت، شفاف تحقیقات کا مطالبہ

کوئٹہ (این این آئی) نیشنل پارٹی کے مرکزی سیکرٹری جنرل میر کبیر احمد محمدشہی نے نیشنل پارٹی کے بزرگ رہنماء حاجی صالح محمد بلوچ کے فرزند، نیشنل پارٹی کے رکن صوبائی اسمبلی رحمت صالح بلوچ اور ڈسٹرکٹ چیئرمین پنجگور عبدالمالک صالح بلوچ کے بھائی ولید صالح بلوچ کے بہیمانہ قتل کی شدید مذمت کرتے ہوئے کہا ہے کہ بلوچستان میں جمہوری سیاسی عمل کو کچلنے کےلیے پرامن سیاسی کارکنان، رہنماوں اور ان کے خاندانوں کے خلاف پرتشدد حربے استعمال کیے جارہے ہیں۔ حاجی صالح محمد بلوچ کے گھرانے نے ہمیشہ پرامن، جمہوری، رواداری پر مبنی قوم و عوام دوست سیاست اور خدمت کی ہے۔ ایسے بزدلانہ ہتھکنڈوں سے نیشنل پارٹی اور شہید ولید کے خاندان کو جمہوری سیاسی جدوجہد اور عوامی خدمت سے دستبردار نہیں کرایا جاسکتا ہے۔ بلوچستان پر مسلط کردہ فارم 47 کی حکومت حالات کی سنگینی کا ادراک اور اپنی بنیادی ذمہ داریاں پوری کرتے ہوئے عوام کو تحفظ فراہم کرنے کی بجائے صرف دعووں تک محدود ہے۔ بلوچستان میں لاقانونیت، بدامنی اور عدم تحفظ میں روز بہ روز اضافہ ہورہا ہے۔ ولید صالح کی شہادت کے دلخراش واقعہ کی شفاف تحقیقات کرکے اس کے محرکات کو سامنے لایا جائے اور ملوث عناصر کو کیفرکردار تک پہنچایا جائے۔ اس مشکل وقت میں نیشنل پارٹی حاجی صالح محمد بلوچ کے خاندان کے ساتھ کھڑی ہے اور ان کے غم میں شریک اور سوگوار ہے۔ اللہ سے دعا ہے کہ وہ شہید ولید کی مغفرت فرمائے اور انہیں اپنے جوار رحمت میں جگہ عطاء کرے اور لواحقین کو صبر جمیل عطا کرے۔