پاکستان دنیا میں چوتھا تیزی سے آبادی بڑھانے والا ملک بن رہا ہے،ظفر علی بلیدی

کوئٹہ(این این آئی)سیکرٹری پاپولیشن بلوچستان ظفر علی بلیدی،یو این ایف پی اے اسلام آباد کے ٹیکنیکل اسپیشلسٹ(ایس آر ایچ) ڈاکٹر جمیل احمد،ڈائریکٹر جنرل پاپولیشن ویلفیئر ڈیپارٹمنٹ غلام مصطفی،ڈویژنل ڈائریکٹر پی ڈبلیو ڈی کوئٹہ عبدالستار شاہوانی،یو این ایف پی اے بلوچستان کی پروگرام کوارڈی نیٹر سعدیہ عطاء نے کہا ہے کہ پاکستان دنیا میں چوتھا تیزی سے آبادی بڑھانے والا ملک بن رہا ہے اسی شرح سے آبادی بڑھتی رہی تو آئندہ 22سا ل میں ملکی آبادی دوگنی جبکہ 2050ء میں پاکستان کی آبادی 35کروڑ 80لاکھ تک پہنچ جائے گی ملک میں خاندانی منصوبہ بندی کا استعمال صرف 19.8فیصد ہے جبکہ ہر ایک لاکھ میں سے زچگی کے 298اموات ہوتی ہیں پاکستان میں بڑھتی ہوئی آبادی کی شرح قابو کرنے کیلئے تمام اسٹیک ہولڈرز کو ملکرکام کرنے کی ضرورت ہے۔یہ بات انہوں نے منگل کو مقامی ہوٹل میں ایک روزہ پبلک پرائیویٹ پلس ماڈل پر ورکشاپ سے خطاب کرتے ہوئے کہی۔مقررین نے کہا کہ پاکستان اور خاص کربلوچستان میں زچگی کے دوران ماؤں کی شرح اموات بہت زیادہ ہے جس پر قابو پانے کیلئے محکمہ پاپولیشن،محکمہ صحت،یو این ایف پی اے اوردیگر اسٹیک ہولڈز ملکر کام کریں۔انہوں نے کہا کہ محکمہ پاپولیشن،یو این ایف پی اے دیگراسٹیک ہولڈز کے ساتھ ملکر ڈاکٹرز،پیرامیڈیکس اور محکمہ پاپولیشن کے ملازمین کی ٹریننگ کررہا ہے تاکہ ماؤں کی شرح اموات میں زیادہ سے زیادہ کمی لائی جاسکے۔ انہوں نے کہا کہ پاکستان کی آبادی میں روز بروز اضافہ ہورہاہے جس سے بہت سے مسائل پیدا ہورہے ہیں اور اس سے ماں اور بچے کی صحت پر بھی برے اثرات مرتب ہوتے ہیں ہمیں چاہئے کہ بچے کی پیدائش کم از کم تین سال کا وقفہ ضرورکریں جس کیلئے خاندانی منصوبہ بندی کے منصوبوں پر کام کرنے کی ضرورت ہے۔ انہوں نے کہا کہ محکمہ پاپولیشن، محکمہ صحت بلوچستان، یواین ایف پی اے ملکر خاندانی منصوبہ بندی سے متعلق لوگوں میں شعور اور آگاہی کیلئے کام کررہے ہیں اورخاندانی منصوبہ بندی کرنے والوں کو تمام ترسہولیا ت کی فراہمی یقینی بنائی جارہی ہے۔۔انہوں نے کہا کہ آج کی ٹریننگ کا مقصد بھی یہی ہے کہ ڈاکٹرز،پیرامیڈیکل،گائناکالوجسٹ اور محکمہ سوشل ویلفیئر کے عملے کو ٹریننگ دیکردیہی علاقوں میں بھیجا جائے تاکہ وہ لوگوں کو خاندانہ منصوبہ بندی کے بارے میں آگاہی فراہم کرسکیں۔