بلوچستان اسپیشل ڈویلپمنٹ انیشیٹوو فیز ون کے تحت کچھی میں ترقیاتی منصوبوں پر کام جاری

بولان(این این آئی)بلوچستان اسپیشل ڈویلپمنٹ انیشیٹوو (BSDI) فیز ون کے تحت ضلع کچھی میں ترقیاتی منصوبوں پر تیزی سے کام جاری ہے ڈپٹی کمشنر کچھی کیپٹن (ر) جمعہ داد خان مندوخیل کی خصوصی ہدایت پر ضلع بھر کے 50 مختلف اسکولوں، 10 بی ایچ یوز، 5 پلوں، متعدد سرکاری دفاتر، 5 ٹی ایچ کیو اور ڈی ایچ کیو اسپتالوں میں تعمیراتی مرمت اور سولرائزیشن کے منصوبے جاری ہیں اس حوالے سے گفتگو کرتے ہوئے ڈی سی نے کہا کہ بلوچستان اسپیشل ڈویلپمنٹ انیشیٹوو صوبائی حکومت کا ایک انقلابی منصوبہ ہے جس کا مقصد پسماندہ اضلاع میں تعلیم، صحت، رابطہ سڑکوں اور سرکاری دفاتر کی کارکردگی کو بہتر بنانا ہے انہوں نے کہا کہ اس پروگرام کے تحت اسکولوں میں کلاس رومز، امتحانی ہال کی تزئین و آرائش اور پینے کے صاف پانی کی فراہمی کے ساتھ ساتھ، شمسی توانائی کے نظام کی تنصیب سے بجلی کی مسلسل فراہمی ممکن بنائی جا رہی ہے صحت کے مراکز کے حوالے سے ڈپٹی کمشنر کچھی کیپٹن ریٹائرڈ جمعہ داد خان مندوخیل کا کہنا تھا کہ بی ایچ یوز، ٹی ایچ کیوز اور ڈی ایچ کیو اسپتالوں کی مرمت و توسیع کے بعد شہریوں کو بہتر علاج و معالجے کی سہولیات میسر آئیں گی جبکہ سولرائزیشن سے ان اداروں کو بجلی کی لوڈشیڈنگ سے نجات ملے گی ڈپٹی کمشنر نے متعلقہ محکموں کے افسران کو ہدایت کی کہ وہ منصوبوں کے معیار اور رفتار پر کسی قسم کا سمجھوتہ نہ کریں اور ہر کام مقررہ وقت میں مکمل کریں اخر میں انہوں نے عوام سے اپیل کی کہ وہ ان ترقیاتی منصوبوں کی حفاظت اور پائیداری کے لیے انتظامیہ کے ساتھ مکمل تعاون کریں تاکہ ضلع کچھی میں ترقی و خوشحالی کا نیا دور شروع ہو سکے۔