شہریوں کی سہولت کیلئے کوئٹہ سمیت دیگر سرد اضلاع میں گیس لوڈشیڈنگ کے اوقات میں تبدیلی کی جائے، ارکان بلوچستان اسمبلی کا مطالبہ

کوئٹہ(این این آئی)اسپیکر بلوچستان اسمبلی کی گزشتہ اجلاس میں رولنگ پر سوئی سدرن گیس کمپنی کوئٹہ کے جنرل مینیجر کو طلب کیا گیا یہ طلبی رکن صوبائی اسمبلی علی مدد جتک کی جانب سے اْٹھائے گئے نکتہ کے تحت عمل میں لائی گئی۔اس موقع پر اسپیکر بلوچستان اسمبلی کیپٹن (ر) عبدالخالق خان اچکزئی، صوبائی وزراء سلیم احمد خوسہ، علی مدد جتک، اصغر علی رند، اور محمد خان لہڑی, جنرل مینیجر ایس ایس جی سی اور دیگر متعلقہ حکام اجلاس میں شریک ہوئے۔ اجلاس میں صوبے کے عوام کو گیس کی مناسب اور بلا تعطل فراہمی کے امور پر تفصیلی غور و خوض کیا گیا۔اسپیکر عبدالخالق خان اچکزئی نے کہا کہ چمن صوبے کا ایک انتہائی سرد علاقہ ہے جہاں گیس کی فراہمی نہایت ضروری ہے۔ انہوں نے کہا کہ ہم چمن ضلع میں گیس فراہمی کے منصوبے کو عملی جامہ پہنانے کے لیے کوشاں ہیں تاکہ عوام کو ریلیف فراہم کیا جا سکے۔اجلاس میں اراکین نے سردیوں کے موسم میں عوام کو درپیش گیس فراہمی کے مسائل اْجاگر کیے اور جنرل مینیجر سے مطالبہ کیا کہ کوئٹہ سمیت دیگر سرد اضلاع میں گیس کی لوڈشیڈنگ کے اوقات میں تبدیلی کی جائے تاکہ شہریوں کو سہولت میسر آ سکے۔جنرل مینیجر سوئی سدرن گیس کمپنی نے اسپیکر اور اراکین اسمبلی کو یقین دہانی کرائی کہ سرد علاقوں میں گیس لوڈشیڈنگ کے اوقات میں نرمی پر غور کیا جائے گا، کیونکہ اس وقت پورے ملک میں یکساں لوڈشیڈنگ شیڈول نافذ ہے۔ انہوں نے مزید بتایا کہ کابینہ کی منظوری کے بعد چمن ضلع کو ایل پی جی گیس کی فراہمی ممکن بنائی جائے گی۔