ایس پی اْوستہ محمد غلام حسین باجوئی کا ڈکیتی کی وائرل ویڈیو پر فوری ایکشن

فیض آباد(این این آئی)ایس پی اْوستہ محمد غلام حسین باجوئی نے گزشتہ روز ایری لاڑہ روڈ پر ہونے والی ڈکیتی کی وائرل ویڈیو کا سخت نوٹس لے لیا۔ ایس پی نے واقعہ پر برہمی کا اظہار کرتے ہوئے ڈی ایس پی سرکل اْوستہ محمد، ایس ایچ او تھانہ سٹی اور انچارج 15 مددگار اْوستہ محمد کو فوری دفتر طلب کیا۔ایس پی غلام حسین باجوئی نے ابتدائی انکوائری کے بعد محکمہ جاتی کارروائی کے احکامات جاری کرتے ہوئے 15 پر موجود دو سنتری معطل کرنے جبکہ انچارج 15 مددگار کو شوکاز نوٹس جاری کیا۔ مزید برآں ڈی ایس پی سرکل اْوستہ محمد اور ایس ایچ او تھانہ سٹی سے تحریری جواب طلبی کے احکامات دیے گئے۔ایس پی غلام حسین باجوئی نے واضح کیا کہ غفلت یا لاپرواہی کسی صورت برداشت نہیں کی جائے گی۔ انہوں نے ہدایت کی کہ ملزمان کو 5 یوم کے اندر اندر ٹریس کرکے گرفتار کیا جائے، بصورت دیگر غفلت کے مرتکب افسران کے خلاف سخت محکمانہ کارروائی عمل میں لائی جائے گی۔