زہری میں تمام شاہراہیں کھولنے کا فیصلہ، نواب ثناء اللہ زہری اور نوابزادہ امیر حمزہ زہری کے اعلیٰ حکام سے رابطے رنگ لے آئے

کوئٹہ+کراچی (این این آئی) پاکستان پیپلز پارٹی کے مرکزی رہنما اور سابق وزیر اعلیٰ بلوچستان چیف آف جھالاوان نواب ثناء اللہ خان زہری اور صوبائی مشیر بلدیات نوابزادہ امیر حمزہ زہری کے اعلیٰ حکام سے مسلسل رابطوں کے بعد زہری جانے والی تمام شاہراہیں مکمل طور پر کھولنے کا فیصلہ کر لیا گیا ہے نواب ثناء اللہ خان زہری نے جھالاوان ہاوس کراچی میں تحصیل زہری سے آئے ہوئے مختلف وفود سے بات چیت کرتے ہوئے کہا کہ“زہری” میرا گھر ہے، امن و امان کے قیام کے لیے کیے گئے اقدامات سے مطمئن ہوں۔ ان کا کہنا تھا کہ انہوں نے صوبائی مشیر بلدیات نوابزادہ امیر حمزہ زہری کو ہدایت دی تھی کہ وہ اعلیٰ ضلعی و سیکورٹی حکام سے قریبی رابطے میں رہیں، جب کہ خود انہوں نے بھی اس سلسلے میں اعلیٰ عسکری حکام سے رابطہ کیا سابق وزیر اعلیٰ نے مزید بتایا کہ اس سے قبل زہری میں عائد کرفیو میں نرمی کی گئی تھی اور اب حالات میں بہتری کے پیشِ نظر تمام شاہراہیں کھولنے کا فیصلہ کیا گیا ہے تاکہ علاقے کے شہری آزادانہ نقل و حرکت کر سکیں۔