غریب اور مخلص کارکن جماعت کی اصل قوت اور شان، انہی کی بدولت جمعیت کی ساخت مضبوط اور مستحکم ہے،مولانا عبدالرحمن رفیق

کوئٹہ (این این آئی)جمعیت علما اسلام ضلع کوئٹہ کے امیر مولانا عبد الرحمن رفیق نے حلقہ 20 شالدرہ یونٹ کی جانب سے منعقدہ استقبالیہ تقریب سے خطاب کرتے ہوئے کہا کہ غریب اور مخلص کارکن جماعت کی اصل قوت اور شان ہیں، انہی کی بدولت جمعیت کی ساخت مضبوط اور مستحکم ہے۔ انہوں نے کہا کہ ہر دور میں جمعیت نے باطل قوتوں کا مقابلہ کارکنان کی ہمت اور اخلاص سے کیا، یہی کارکن ہماری تنظیمی زندگی کا سرمایہ اور ہمارے سیاسی استحکام کی بنیاد ہیں۔انہوں نے مزید کہا کہ جمعیت علماء اسلام کا پیغام امن، استقامت اور خدمتِ دین پر مبنی ہے۔ ہمارا ہر کارکن اپنے کردار اور عمل سے اس پیغام کو عوام تک پہنچانے میں مصروفِ عمل ہے۔تقریب سے یونٹ کے امیر مفتی عطاء الرحمن اور سیکرٹری جنرل مولانا نقیب اللہ نے بھی خطاب کیا۔ انہوں نے کہا کہ قائد جمعیت مولانا فضل الرحمن کی سیاسی بصیرت، استقامت اور جرات مندانہ فیصلے ہی وہ بنیاد ہیں جن کی بدولت جمعیت ضلع کوئٹہ ایک ناقابلِ تسخیر سیاسی و مذہبی قوت کے طور پر ابھر رہی ہے۔انہوں نے کہا کہ جمعیت کے کارکنان نظریاتی بنیادوں پر منظم ہیں اور ان کی وفاداری اور قربانیاں پارٹی کے مستقبل کی ضمانت ہیں۔