نوکنڈی میں ایکسائز اینڈ ٹیکسیشن کے دفتر کا باقاعدہ افتتاح کردیا گیا

نوکنڈی(این این آئی)ایس پی چاغی محمد شریف نے نوکنڈی تفتان کے لیے قائم کردہ ایکسائز اینڈ ٹیکسیشن ڈیپارٹمنٹ کے دفتر کا باقاعدہ افتتاح کر دیا۔اس موقع پر ایک سادہ مگر پروقار تقریب کا انعقاد کیا گیا جس میں مختلف محکموں کے افسران اور معزز شہریوں نے شرکت کی۔تقریب میں شریک شخصیات میں ایکسائز آفیسر سعید احمد، انسپکٹر محمد اسحاق ایجباڑی، ایس ایچ او نوکنڈی عبدالقادر مینگل، سب انسپکٹر حمید بھائی جان، ایکسائز کلرک شیر دل مجاز سمالانی، ثناء اللہ نوتانی، سہیل احمد سنجرانی، تاج محمد، امان اللہ اور دیگر معزز شہری شامل تھے۔ایس پی چاغی محمد شریف نے اپنے خطاب میں کہا کہ نوکنڈی اور تفتان میں ایکسائز اینڈ ٹیکسیشن دفتر کا قیام عوام کے لیے ایک مثبت اور خوش آئند قدم ہے۔ اس سے نہ صرف ٹیکس نظام میں شفافیت اور بہتری آئے گی بلکہ شہریوں کو مقامی سطح پر سہولتیں بھی میسر آئیں گی۔انہوں نے مزید کہا کہ محکمہ عوام کے ساتھ قریبی روابط قائم رکھے گا اور کرپشن کے خلاف زیرو ٹالرنس پالیسی پر سختی سے عمل کیا جائے گا۔آخر میں ایس پی چاغی محمد شریف نے ایکسائز اینڈ نارکوٹکس ڈیپارٹمنٹ نوکنڈی و تفتان کو پولیس ڈیپارٹمنٹ کی جانب سے مکمل تعاون کی یقین دہانی کرائی، جس پر محکمہ ایکسائز کی جانب سے ان کا شکریہ ادا کیا گیا۔