بلدیاتی انتخابات کی تیاری،ڈسٹرکٹ ریٹرننگ افسر اور ریٹرننگ افسران کی تربیت کا انعقاد

کوئٹہ(این این آئی) صوبائی الیکشن کمیشن بلوچستان کے زیرِ اہتمام ضلع کوئٹہ میں بلدیاتی انتخابات کی تیاری کے سلسلے میں ڈسٹرکٹ ریٹرننگ آفیسر (DRO) اور ریٹرننگ آفیسران (ROs) کے لیے ایک تربیتی سیشن آج صوبائی الیکشن کمشنر بلوچستان کے دفتر میں منعقد ہوا۔ تربیتی سیشن سے خطاب کرتے ہوئے صوبائی الیکشن کمشنر بلوچستان، جناب علی اصغر سیال نے کہا کہ الیکشن کمیشن آزاد، منصفانہ اور شفاف بلدیاتی انتخابات کے انعقاد کے لیے پوری طرح پرعزم ہے۔ انہوں نے تمام آفیسران پر زور دیا کہ وہ انتخابی عمل کی شفافیت، غیرجانبداری اور قانون کی مکمل پاسداری کو یقینی بنائیں۔انہوں نے مزید کہا کہ آج کی تربیت کا مقصد افسران کی استعدادِ کار میں اضافہ کرنا اور انہیں انتخابی امور، پولنگ اسٹیشنز کے انتظام، ضابطہ? اخلاق پر عملدرآمد، اور انتخابی دن کے دوران مؤثر رابطہ کاری سے متعلق رہنمائی فراہم کرنا تھا۔ صوبائی الیکشن کمشنر، جناب علی اصغر سیال نے تمام آفیسران پر زور دیا کہ وہ اپنی پیشہ ورانہ ذمہ داریاں دیانتداری اور مکمل غیرجانبداری کے ساتھ انجام دیں، تاکہ بلوچستان میں شفاف اور پْرامن بلدیاتی انتخابات کے انعقاد کو یقینی بنایا جا سکے۔ قبل ازیں ڈسٹرکٹ ریٹرننگ آفیسر /ڈپٹی کمشنر کوئٹہ، مہر اللہ بادینی نے اپنے زیرِ انتظام تمام ریٹرننگ آفیسران سے ان کے عہدے کا حلف لیا۔