شہید محمد عظیم کھوسہ نے جان دیکر وطن کے امن و امان کی حفاظت کی،میر جعفر کریم بھنگر

چھتر (این این آئی)معروف قبائلی و سماجی رہنما میر جعفر کریم بھنگر نے پولیس اہلکار محمد عظیم کھوسہ کی شہادت پر گہرے دکھ اور رنج کا اظہار کرتے ہوئے کہا کہ شہید محمد عظیم کھوسہ نے اپنی جان دے کر وطن کے امن و امان کی حفاظت کی ان کی قربانی اس بات کی علامت ہے کہ بلوچستان کے بیٹے وطن کی حفاظت کے لیے کسی بھی قربانی سے دریغ نہیں کرتے انہوں نے کہا کہ قوم ایسے بہادر سپوتوں کی قربانیوں پر ہمیشہ ناز کرتی ہے۔ شہید محمد عظیم کھوسہ نے جو مثال قائم کی ہے، وہ آنے والی نسلوں کے لیے جرات، وفاداری اور ایثار کا پیغام ہے میر جعفر کریم بھنگر نے اپنے تعزیتی بیان میں کہا کہ ایک پولیس اہلکار کا شہید ہونا صرف ادارے کا نہیں بلکہ پورے معاشرے کا نقصان ہے۔ محمد عظیم کھوسہ جیسے فرض شناس جوانوں کی بدولت آج ہم پرامن زندگی گزار رہے ہیں۔ ان کی خدمات کو کبھی فراموش نہیں کیا جا سکتا انہوں نے حکومتِ بلوچستان سے مطالبہ کیا کہ شہید کے خاندان کو مکمل سرکاری اعزاز کے ساتھ خراجِ عقیدت پیش کیا جائے، مالی امداد اور بچوں کے مستقبل کے لیے خصوصی اسکالرشپ دیے جائیں میر جعفر کریم بھنگر نے کہا اللہ تعالیٰ شہید محمد عظیم کھوسہ کے درجات بلند فرمائے، ان کے اہلِ خانہ کو صبرِ جمیل اور ہمت عطا کرے۔ قوم ان کی قربانی کو سلام پیش کرتی ہے یہ دھرتی اپنے بہادر بیٹوں کے خون سے ہی سرخرو ہے۔