بھارت کشمیر میں بنیادی انسانی حقوق، حق خود ارادیت اور عالمی قوانیں کو مسلسل پامال کر رہا ہے،وزیر اعظم

اسلام آباد (این این آئی)وزیراعظم محمد شہباز شریف نے کہاہے کہ بھارت کشمیر میں بنیادی انسانی حقوق، حق خود ارادیت اور عالمی قوانیں کو مسلسل پامال کر رہا ہے،عالمی سفارتی محاذ پر مسئلہ کشمیر کو اجاگر کرتا رہے گا اور کشمیریوں کی سیاسی، سفارتی اور اخلاقی تعاون جاری رکھے گا،عالمی برادری کو بھارت کی طرف سے کشمیر میں انسانی حقوق کی خلاف ورزیوں اور عالمی قوانین کی پامالی کے خلاف بھرپور آواز اٹھانی چاہیے۔ 6 نومبر یوم شہدائے جموں پر اپنے پیغام میں انہوں نے کہاکہ چھ نومبر 1947 جموں و کشمیر کی تاریخ کا وہ سیاہ دن ہے جو کشمیریوں کے ذہن پر تقریباً 8 دہائیوں کے بعد بھی تازہ زخم کی طرح نقش ہے، ہر سال دنیا بھر میں موجود کشمیری اس دن کو بھارتی فوج کی کشمیریوں کی پہلی نسل کشی کی مذمت کے طور پر مناتے ہیں۔انہوں نے کہاکہ نومبر 1947 میں بھارتی فوجی اور شدت پسندوں نے ہزاروں (237000) کشمیریوں کو بہیمانہ تشدد اور نسل کشی کا نشانہ بنایا تاکہ کشمیر کی آبادیاتی اور مذہبی اکثریت کو اقلیت میں بدلا جا سکے۔ انہوں نے کہاکہ بھارت کی طرف سے کشمیر میں مسلمانوں کی اکثریت کو مصنوعی طریقے سے بدلنے کے غیر قانونی حربے آج تک جاری ہیں، 5 اگست 2019 کو اٹھائے گئے اقدامات اسی سلسلے کی ایک کڑی ہیں۔ انہوں نے کہاکہ پاکستان آزادی کی اس طویل جدوجہد میں کشمیریوں کی قیمتی جانوں کے نذرانوں اور بالخصوص نومبر 1947 میں ہزاروں کشمیریوں کی شہادت کو خراج عقیدت پیش کرتا ہے۔ انہوں نے کہاکہ بھارت بین الاقوامی قوانین اور اقوام متحدہ سیکیورٹی کونسل کی قراردادوں کے منافی اپنی مسلح افواج کے ذریعے کشمیریوں پر اپنے غیر قانونی تسلط اور ناجائز قبضے کو قائم رکھے ہوئے ہے، پاکستان اور انسانی حقوق کی علمبردار تمام آوازیں اس کی بھرپور مذمت کرتے ہیں۔انہوں نے کہاکہ بھارت کشمیر میں بنیادی انسانی حقوق، حق خود ارادیت اور عالمی قوانیں کو مسلسل پامال کر رہا ہے۔انہوں نے کہاکہ آج کا دن کشمیریوں کی لازوال بہادری اور جدوجہد آزادی کے لیے انکے غیر متزلزل عزم کا مظہر ہے۔ انہوں نے کہاکہ آج کا دن گواہ ہے کہ کشمیریوں کی نسلوں نے بھارت کے ظلم و جبر کے اگے سر نگوں نہیں کیا بلکہ دہائیوں تک بے مثال جرات اور جوانمردی سے مقابلہ کیا اور کبھی قربانیوں سے گریز نہیں کیا۔ انہوں نے کہاکہ آج کے دن حکومت پاکستان اور پاکستان کی عوام کشمیری بھائیوں اور بہنوں کی گراں قدر قربانیوں کو دلی طور پہ خراج تحسین پیش کرتی ہے اور مقبوضہ جموں و کشمیر کے مظلوم عوام کے ساتھ بھرپور اظہار یکجہتی کرتی ہے۔ مزید براں پاکستان اپنے عزم کا اعادہ کرتا ہے کہ عالمی سفارتی محاذ پر مسئلہ کشمیر کو اجاگر کرتا رہے گا اور کشمیریوں کی سیاسی، سفارتی اور اخلاقی تعاون جاری رکھے گا۔انہوں نے کہاکہ عالمی برادری کو بھارت کی طرف سے کشمیر میں انسانی حقوق کی خلاف ورزیوں اور عالمی قوانین کی پامالی کے خلاف بھرپور آواز اٹھانی چاہیے،پاکستان کا ہر بین الاقوامی فورم پر یہ اصولی موقف ہے کہ اقوام متحدہ سلامتی کونسل کی قراردادوں اور کشمیریوں کی خواہشات کے مطابق مسئلہ کشمیر کا پرامن حل ہونا چاہیے۔