مکران کوسٹل ہائی وے پر مسافر کوچ،گیس باؤزر میں تصادم،5افراد زندہ جل گئے

اوتھل (این این آئی) مکران کوسٹل ہائی وے پر ایک اور خونی حادثہ، کنڈ ملیر کے قریب مسافر کوچ اور گیس باؤزر میں تصادم 5 افراد زندہ جل گئے، دو شدید زخمی، باقی مسافروں نے مسافر کوچ سے کود کر جان بچائی، ریسکیو اور پولیس زرائع کے مطابق کنڈ ملیر کے قریب دلتوس چڑھائی کے مقام پر کراچی سے گوادر جانے والی مسافر کوچ اور مخالف سمت سے آنے والے LPG باؤزر میں تصادم کے نتیجے میں اور دونوں گاڑیوں میں آگ لگنے کے نتیجے میں 5 افراد جھلس کر جاں بحق ہوگئے جب کہ 2 افراد شدید زخمی ہوگئے۔ باقی مسافروں نے کوچ کے شیشے توڑ کر اور کود کر اپنی جانیں بچائیں ورنہ جانی نقصان زیادہ ہونے کا اندیشہ تھا۔ SHO لیاری عبدالجلیل سومرو پولیس ٹیم کے ہمراہ اور ریسکیو ٹیمیں موقع پر پہنچ گئیں۔اور امدادی کارروائیوں میں حصہ لیا یہ حادثہ صبح پیش آیا لیکن شام تک آگے کے شعلے بھڑک رہے تھے جس سے ریسکیو ٹیموں کو مشکلات کا سامنا کرنا پڑا۔حادثہ اس قدر شدید تھا کہ ہر طرف چیخ وپکار کی آوازیں آرہی تھیں۔ریسکیو ٹیموں نے زندہ جل جانے اور زخمیوں کو قریبی اسپتالوں میں منتقل کیا۔