معیاری گندم کی فراہمی تک لاہور کی فلور ملز آٹا سپلائی نہیں کریں گی

لاہور(این این آئی)لاہور کے فلور مل مالکان نے اعلان کیا ہے کہ معیاری گندم کی فراہمی تک لاہور کی فلور ملز آٹا سپلائی نہیں کریں گی۔یہ اعلان لاہور میں ضلع لاہور کی فلور ملز مالکان کے اجلاس میں کیا گیا ہے۔ اجلاس میں فلور مل مالکان کی جانب سے فلور ملوں کو فراہم کی جانے والی گندم کی کوالٹی پر شدید تحفظات کا اظہار کیا، فلور ملز مالکان نے اجلاس کو بتایا کہ فلور ملز کوفراہم کی جانے والی گندم انتہائی ناقص اور بدبودار ہے۔ جس کی وجہ سے آٹے کی کوالٹی شدید متاثر ہو رہی ہے۔ مارکیٹ سے شکایات آرہی ہیں، آٹا ڈیلر اوردوکاندار خراب کوالٹی کی وجہ سے مال واپس کر رہے ہیں، اجلاس میں مطالبہ کیا گیا کہ حکومت فلور ملز کو اچھی کوالٹی کی گندم فراہم کرے تاکہ معیاری مصنوعات تیار کی جا سکیں۔