وزیر داخلہ محسن نقوی کا مفکر پاکستان شاعر مشرق علامہ محمد اقبالؒکو شاندار الفاظ میں خراج عقیدت

اسلام آباد (این این آئی)وفاقی وزیر داخلہ محسن نقوی نے مفکر پاکستان شاعر مشرق علامہ محمد اقبالؒکو شاندار الفاظ میں خراج عقیدت پیش کرتے ہوئے کہا ہے کہ ہمیں اقبالؒ کے اصولوں پر عمل کرتے ہوئے پاکستان کی ترقی، اتحاد اور امن کے لیے کوشاں رہنا ہوگا۔اتوار کو یوم اقبال پر اپنے پیغام میں وفاقی وزیر نے کہا کہ اقبالؒکی شخصیت اور فکر ایک بے مثال میراث، جس نے مسلمانان ہند میں خودی اور وقار کا جذبہ بیدار کیا،پاکستان اقبال کے خواب کی تعبیر ہے اور اس کی حفاظت ہم سب کی ذمہ داری ہے۔محسن نقوی نے کہا کہ علامہ اقبالؒکے افکار آج بھی ہمارے لیے رہنمائی کا سرچشمہ ہیں، اقبال کے فلسفہ خودی نے نوجوانوں کو بلند حوصلہ، غیر متزلزل ایمان اور خود اعتمادی عطا کی،اقبالؒکی شاعری لازوال پیغام ہے جو عمل اور فکر کی دعوت دیتی ہیں۔انہوں نے کہا کہ ہمیں اقبالؒکے اصولوں پر عمل کرتے ہوئے پاکستان کی ترقی، اتحاد اور امن کے لیے کوشاں رہنا ہوگا،نوجوانوں کے لیے اقبالؒکے افکار مشعل راہ ہیں، اپنی خودی پہچانیں اور محنت سے پاکستان کے روشن مستقبل کی تعمیر کریں۔وفاقی وزیر نے کہا کہ ہمیں اپنے ملک کی تعمیر و ترقی کے لیے اقبال کے پیغام کو اپنانا ہے،اللہ تعالیٰ ہمیں اقبال کے افکار پر عمل کرنے اور وطن کو ترقی کی بلندیوں تک پہنچانے کی توفیق دے۔