جمعیت علماء اسلام کے وفد کی ڈپٹی کمشنر پنجگور سے ملاقات

پنجگور(این این آئی) ڈپٹی کمشنر پنجگور کے دفتر میں جمعیت علمائے اسلام (ف) کے ضلعی وفد نے ڈپٹی کمشنر پنجگور سے ملاقات کی۔وفد میں حافظ محمد اعظم، مولوی عبدالعلیم، مولوی عطاء اللہ، مولوی علی احمداور جمعیت سے تعلق رکھنے والے دیگر اراکین شامل تھے۔ملاقات کا بنیادی مقصد ضلع پنجگور میں امن و امان کی صورتحال، سرحدی مسائل اور عوامی مشکلات پر تبادلہ خیال کرنا تھا۔وفد نے ڈپٹی کمشنر کو ضلع میں امن و امان کے حوالے سے تفصیلی بریفنگ دی اور بارڈر کے معاملات پر بھی بات چیت کی۔ وفد نے اس بات پر زور دیا کہ پنجگور کا بارڈر علاقے کے عوام کے لیے روزگار کا ایک اہم ذریعہ ہے، لہٰذا عوام کو زیادہ سے زیادہ روزگار کے مواقع فراہم کیے جائیں کیونکہ ہزاروں لوگ اپنی گزر بسر کے لیے اس بارڈر پر انحصار کرتے ہیں۔امن و امان کے حوالے سے وفد نے مطالبہ کیا کہ ضلع میں پائیدار امن کے قیام کے لیے تمام ممکنہ اقدامات کیے جائیں آخر میں ڈپٹی کمشنر پنجگور عبدالکبیر زرکون نے وفد کو یقین دلایا کہ ضلع میں امن و امان کی بہتری کے لیے اور بارڈر سے متعلق عوامی مسائل کو بھی ترجیحی بنیادوں پر حل کیا جائے گا۔