عوامی و علاقائی خدمت میرا مشن،واشک کی پسماندگی کے خاتمے کیلئے تمام دستیاب وسائل بروئے کار لائے جا رہے ہیں،میرزابد علی ریکی

ماشکیل (این این آئی)ایم پی اے و خادمِ واشک حاجی میر زابد علی ریکی نے کہا ہے کہ عوامی و علاقائی خدمت میرا مشن ہے اور ضلع واشک کی پسماندگی کے خاتمے کے لیے تمام دستیاب وسائل بروئے کار لائے جا رہے ہیں۔ انہوں نے کہا کہ ضلع میں تعلیمی اداروں، بنیادی صحت کے مراکز اور ذرائع آب نوشی کو بہتر بنانے کے لیے عملی اقدامات جاری ہیں اور عوام کو بنیادی سہولیات کی فراہمی میں نمایاں بہتری آئی ہے۔وہ پاک ایران سرحد پر واقع تحصیل ماشکیل میں مختلف اداروں کے دوروں کے موقع پر گفتگو کر رہے تھے۔ایم پی اے حاجی میر زابد علی ریکی نے بینظیر انکم سپورٹ پروگرام آفس کا دورہ کیا، بعد ازاں گرلز ہائی اسکول ماشکیل پہنچے جہاں انہوں نے اسکول کو سولر سسٹم سے منسلک کرنے، کمروں کی رنگ و روغن، اور طالبات کے لیے ٹیبل و کرسیاں فراہم کرنے کا اعلان کیا۔ایم پی اے نے بی ایچ یو سوتگان ماشکیل کے لیے مکمل سولرائزیشن سسٹم کی منظوری بھی دے دی، جبکہ اپنے فنڈز سے تعمیر شدہ بی ایچ یو لدگشت ماشکیل کا باقاعدہ افتتاح کردیا۔اس موقع پر سردار حاجی دولت خان ریکی، حاجی اسرار ریکی، وائس چیئرمین میر عکاشہ ملازئی، حاجی وسیم ریکی، حاجی بلند خان ریکی، میر نغدی ریکی، قادر بخش ریکی، شیرا سنجرزئی اور حاجی مراد دیہانی بھی موجود تھے۔