لورالائی(این این آئی)کمشنر لورالائی ڈویڑن ولی محمد بڑیچ نے شہید بینظیر بھٹو اسپتال لورالائی کا دورہ کیا۔ دورے کے دوران انہوں نے آپریشن تھیٹر، لیبر روم اور دیگر طبی شعبوں کا تفصیلی معائنہ کیا اور حکومت کی جانب سے فراہم کردہ سہولیات کا بغور جائزہ لیااس موقع پر ڈویڑنل ڈائریکٹر ہیلتھ ڈاکٹر مقبول اور ڈسٹرکٹ ہیلتھ آفیسر ڈاکٹر عبدالحلیم بھی ان کے ہمراہ موجود تھے۔ اسپتال انچارج نے کمشنر کو درپیش مسائل سے آگاہ کیا، خصوصاً بلا تعطل بجلی کی فراہمی کا مسئلہ اجاگر کیاکمشنر ولی محمد بڑیچ نے معاملے کی فوری نوعیت کو دیکھتے ہوئے واپڈا حکام سے رابطہ کیا اور ہدایت جاری کی کہ اسپتال کو مسلسل بجلی فراہم کی جائے تاکہ علاج و معالجہ کی سہولیات متاثر نہ ہوں۔ انہوں نے واضح کیا کہ اسپتال جیسے حساس ادارے میں بجلی کی بندش ناقابل برداشت ہے کیونکہ اس کا براہ راست اثر مریضوں خصوصاً زچگی کے عمل پر پڑتا ہے۔کمشنر نے صحت کے عملے کو صفائی، سہولیات اور طبی خدمات میں بہتری کے لیے ہدایات جاری کیں تاکہ عوام کو معیاری طبی ماحول فراہم کیا جا سکے عوامی حلقوں نے کمشنر کے بروقت اقدام کو سراہتے ہوئے اْمید ظاہر کی ہے کہ ان کی قیادت میں صحت کا شعبہ مزید فعال اور مؤثر انداز میں آگے بڑھے گا۔
کمشنر لورالائی ڈویژن ولی محمد بڑیچ کا شہید بینظیر بھٹو ہسپتال کا دورہ
