لاکھڑا شہر میں آوارہ کتوں کی یلغار، شہری خوفزدہ—فوری کارروائی کا مطالبہ

لسبیلہ(بیوروچیف حفیظ دانش)لاکھڑا شہر میں آوارہ کتوں کی یلغار سے شہری شدید پریشان ہیں۔ بازار اور گلیوں میں آوارہ کتے صبح و شام ٹولیوں کی شکل میں گھومتے پھرتے نظر آتے ہیں جس سے خصوصاً بچے اور بزرگ خوف کا شکار ہیں۔ دکانداروں نے بھی شکایت کی ہے کہ ان کتوں کی وجہ سے کاروباری سرگرمیاں متاثر ہو رہی ہیں۔شہریوں کا کہنا ہے کہ کئی بار متعلقہ حکام کو آگاہ کیا گیا مگر تاحال ان آوارہ کتوں کے خلاف کوئی مؤثر کارروائی عمل میں نہیں لائی گئی۔ بازار، اسکولوں، مساجد اور گنجان آباد علاقوں میں یہ کتے بلاخوف گھوم رہے ہیں، جو کسی بھی وقت کسی بڑے حادثے کا سبب بن سکتے ہیں۔عوامی حلقوں نے ڈپٹی کمشنر لسبیلہ محترمہ حمیرا بلوچ اور حکام بالا سے پرزور مطالبہ کیا ہے کہ لاکھڑا شہر میں فوری طور پر آوارہ کتوں کے خاتمے کے لیے آپریشن کیا جائے اور شہریوں کو اس خطرناک صورتحال سے نجات دلائی جائے۔