پاکستان کی تاجکستان میں چینی باشندوں پر ڈرون حملے کی شدید الفاظ میں مذمت

اسلام آباد(این این آئی)پاکستان نے تاجکستان میں 3 چینی باشندوں کی ہلاکت کا سبب بننے والے ڈرون حملے کی شدید الفاظ میں مذمت کی ہے۔جاری بیان میں ترجمان دفتر خارجہ نے حملے میں چین اور تاجکستان کے شہریوں کی ہلاکت پر تعزیت اور یکجہتی کا اظہار کرتے ہوئے کہاکہ پاکستان اس بزدلانہ حملے کی دوٹوک الفاظ میں مذمت کرتا ہے، اس واقعے میں مسلح ڈرون کے استعمال نے افغانستان سے درپیش خطرے اور اس کے پس پردہ عناصر کی ڈھٹائی کو نمایاں کیا ہے۔ترجمان دفترخارجہ نے کہاکہ ایک ایسے ہمسائے کے طور پر جو افغان سرزمین سے منظم دہشت گرد حملوں کا بارہا نشانہ بنا ہے، پاکستانی عوام اپنے چینی دوستوں اور تاجک شراکت داروں کے غم اور تکلیف کو پوری طرح محسوس کرتے ہیں۔ترجمان دفترخارجہ نے کہاکہ پاکستان مسلسل اس بات پر زور دیتا آیا ہے کہ افغان سرزمین کو اپنے ہمسایوں یا کسی دوسرے ملک کے خلاف دہشت گردی کیلئے استعمال نہیں ہونا چاہیے، افغان سرزمین کا دہشت گرد عناصر کی جانب سے بار بار استعمال اور ان کی افغان طالبان حکومت کی سرپرستی میں موجودگی پورے خطے اور عالمی برادری کیلئے باعث تشویش ہے۔ترجمان نے کہاکہ افغان سرزمین سے حملہ کرنے والے دہشت گردوں، ان کے سہولت کاروں اور مالی معاونین کے خلاف ٹھوس اور قابل تصدیق کارروائی ہی اس بڑھتے ہوئے خطرے کا واحد حل ہے۔ترجمان دفترخارجہ نے کہاکہ پاکستان امن، استحکام اور سلامتی کے فروغ کیلئے چین، تاجکستان اور دیگر علاقائی شراکت داروں کے ساتھ قریبی تعاون جاری رکھے گا۔