معذورافراد معاشرے کا اہم حصہ،کسی صورت بھی نظراندازنہیں کیاجاسکتا‘ احسن اقبال

نارووال (این این آئی)وفاقی وزیر منصوبہ بندی ترقی و خصوصی اقدامات احسن اقبال نے کہا ہے کہ حکومت معذور افرادکی مشکلات سے آگاہ ہے اور ان کے حقو ق کے تحفظ کے لیے اپنے تمام وسائل بروئے کارلارہی ہے۔ان خیالات کا اظہار انہوں نے محکمہ سوشل ویلفیئر زیراہتمام معذورافرادمیں الیکٹرانک ویل چیئرکی تقسیم کے حوالے سے تقریب سے خطاب کرتے ہوئے کیا۔احسن اقبال نے کہا کہ معذورافراد معاشرے کا اہم حصہ ہیں جن کوکسی صورت بھی نظراندازنہیں کیاجاسکتا،پنجاب حکومت ان افرادکی مشکلات سے بخوبی آگاہ ہے،ایسے افرادکی حوصلہ افزائی اور ان کے حقو ق کے تحفظ کویقینی بنانے کے لیے اپنے تمام وسائل بروئے کارلارہی ہے،وزیراعلی پنجاب مریم نوازکی طرف سے خصوصی افراد میں الیکٹرانک ویل چیئرز کی فراہمی بھی اسی سلسلہ کی کڑی ہے۔احسن اقبال نے کہا کہ معذور افراد معاشرے میں بوجھ نہیں بلکہ ہمیں ان کا سہارا بننا ہے اور ان کی خدمت کرنی ہے ان کی خدمت سے اللہ راضی ہوتا ہے۔انہوں نے کہاکہ ہمیں معاشرے کے معذور افراد کی بھرپورحوصلہ افزائی کرکے انہیں مفید شہری بنانا ہے۔وفاقی وزیر احسن اقبال نے کہاکہ وزیراعلی پنجاب مریم نواز کی طرف سے معذور افرادکی بحالی کے لئے الیکٹرک ویل چیئرزواکنگ سٹینڈ،سٹک ودیگر اشیا ء کی مفت فراہمی ایک احسن اقدام ہے۔پہلے مرحلہ میں محکمہ سوشل ویلفیئرنارووال کی طرف سے معذورافراد میں 37 الیکٹرک ویل چیئرز،بچوں کے لیے 5مینول ویل چیئرز16 ٹرائی سائیکل،1واکنگ فریم 4 نابیناافرادکے لیے 6سٹک اور3البو کلپرز تقسیم کی گئیں۔