جدہ میں قونصل جنرل خالد مجید کے اعزاز میں شاندار الوداعی تقریب، بیرسٹر امجد ملک کی بطور مہمان خصوصی شرکت

لاہور(این این آئی)قونصل جنرل پاکستان جدہ خالد مجید کے اعزاز میں پروقار اور شاندار الوداعی تقریب کا انعقاد کیا گیاجس میں پاکستان اورسیز کمیشن پنجاب کے وائس چیئرمین بیرسٹر امجد ملک نے بطور مہمان خصوصی شرکت کی۔تقریب کا اہتمام ممتاز شخصیات مسعود احمد پوری، چوہدری اکرم گجر اور شیخ سعید احمد نے کیا۔تقریب میں سعودی عرب کے مختلف شہروں الریاض، مدینہ منورہ، مکہ مکرمہ، ابھا، الطائف سے تعلق رکھنے والی پاکستانی کمیونٹی کی سیاسی، سماجی، کاروباری، ادبی، اقلیتی اور صحافتی تنظیموں کے نمائندگان نے بڑی تعداد میں شرکت کی۔تقریب سے قونصل جنرل خالد مجید، بیرسٹر امجد ملک، چوہدری اکرم گجر، مسعود احمد پوری اور شیخ سعید احمد نے خطاب کیا۔ مقررین نے بیرسٹر امجد ملک کو سعودی عرب آمد پر خوش آمدید کہا اور اوورسیز پاکستانیوں کے لئے ان کی نمایاں خدمات کو خراج تحسین پیش کیا۔مقررین نے قونصل جنرل خالد مجید کی چھ سالہ خدمات کو انتہائی سراہا، خصوصا جدہ قونصلیٹ کی نئی عمارت کی تعمیر کو ان کی بڑی کامیابی قرار دیا۔اپنے الوداعی خطاب میں قونصل جنرل خالد مجید نے کہا کہ سعودی عرب میں ان کا چھ سالہ دورانیہ پاکستانی کمیونٹی کی خدمت کے نام رہا۔ انہوں نے کمیونٹی کے بھرپور تعاون پر شکریہ ادا کرتے ہوئے امید ظاہر کی کہ یہ رشتہ ہمیشہ مضبوط رہے گا۔ انہوں نے بیرسٹر امجد ملک کو کمیونٹی کے چند اہم مسائل سے بھی آگاہ کیا۔وائس چیئرمین اوورسیز پاکستانی کمیشن پنجاب بیرسٹر امجد ملک نے اپنے خطاب میں کہا کہ سعودی عرب میں مقیم پاکستانی وطنِ عزیز کے لئے ریڑھ کی ہڈی کی حیثیت رکھتے ہیں اور ملکی زرمبادلہ میں ان کا حصہ قابلِ فخر ہے۔ انہوں نے وزیراعلی پنجاب محترمہ مریم نواز کے دور میں اوورسیز پاکستانیوں کے لئے کئے گئے اقدامات سے بھی شرکاکو آگاہ کیا۔بیرسٹر امجد ملک نے منتظمین تقریب کو ایک پروقار اور شاندار کمیونٹی تقریب کا اہتمام کرنے پر مبارک باد بھی پیش کی۔آخر میں منتظمین کی جانب سے قونصل جنرل خالد مجید، بیرسٹر امجد ملک اور شیخ سعید احمد کو اعزازی شیلڈز اور تحائف پیش کیے گئے۔