ویب ڈیسک: پیٹرول کی قیمتوں میں اضافے کے تناظر میں سوشل میڈیا پر پھیلنے والی اسکولوں کی طویل بندش کی خبر بے بنیاد ثابت ہو گئی ہے، جس پر حکام نے وضاحت جاری کر دی ہے۔
پنجاب ایجوکیشن ڈیپارٹمنٹ نے واضح کیا ہے کہ6سے 25 اپریل تک تعلیمی اداروں کی بندش سے متعلق گردش کرنے والا نوٹیفکیشن مکمل طور پر جعلی ہے اور اس کا حقیقت سے کوئی تعلق نہیں۔
محکمہ تعلیم کے مطابق ایسی کوئی پالیسی زیر غور نہیں، جبکہ صوبائی وزیر تعلیم کے ترجمان نور الہدیٰ نے بھی اس خبر کی سختی سے تردید کرتے ہوئے کہا کہ حکومت نے اسکول بند کرنے کا کوئی فیصلہ نہیں کیا۔ انہوں نے سوشل میڈیا پر وائرل نوٹیفکیشن کو “من گھڑت” قرار دیا۔
ترجمان نے عوام، خصوصاً والدین اور طلبہ کو خبردار کیا کہ وہ غیر مصدقہ خبروں پر یقین نہ کریں اور صرف سرکاری ذرائع سے جاری ہونے والی معلومات کو مستند سمجھیں۔ ان کا کہنا تھا کہ ایسی افواہیں معاشرے میں غیر ضروری بے چینی اور کنفیوژن پیدا کرتی ہیں۔
مزید برآں محکمہ تعلیم نے یقین دہانی کرائی ہے کہ تعلیمی کیلنڈر یا اوقات کار میں کسی بھی تبدیلی کی صورت میں باضابطہ اعلان سرکاری پلیٹ فارمز کے ذریعے کیا جائے گا۔ فی الحال صوبے بھر کے تمام تعلیمی ادارے معمول کے مطابق کھلے رہیں گے۔
