قلات،دہشتگردوں کیخلاف سکیورٹی فورسزکی بروقت کارروائی،پانچ دہشت گرد ہلاک، 23 مغوی افراد بحفاظت بازیاب،ر شاہد رند

کوئٹہ(این این آئی)وزیراعلیٰ بلوچستان کے معاون برائے اطلاعات و سیاسی امور شاہد رند نے قلات کے قریب دہشت گردوں کے خلاف سکیورٹی فورسز کی کامیاب کارروائی کو خراجِ تحسین پیش کرتے ہوئے کہا ہے کہ بروقت کارروائی کے نتیجے میں پانچ دہشت گرد ہلاک جبکہ دہشت گردوں کے ٹھکانے سے 23 مغوی افراد کو بحفاظت بازیاب کرایا گیا۔شاہد رند نے کہا کہ قومی شاہراہ پر عوام کی پْرامن آمدورفت متاثر کرنے کی دہشت گردوں کی کوشش ناکام بنا دی گئی، جبکہ اغوا برائے تاوان، بھتہ خوری اور گاڑیاں چھیننے والے دہشت گردوں کے خلاف مؤثر کارروائی کی گئی۔انہوں نے کہا کہ دہشت گردوں کے ٹھکانے سے چھ ٹرک، تین بسیں اور دو گاڑیاں برآمد ہوئی ہیں، جبکہ بڑی تعداد میں اسلحہ، گولہ بارود اور دھماکہ خیز مواد بھی برآمد کیا گیا ہے۔معاونِ وزیراعلیٰ نے سکیورٹی فورسز کی پیشہ ورانہ صلاحیت اور بروقت کارروائی کو قابلِ تحسین قرار دیتے ہوئے کہا کہ دہشت گردی کے خلاف جنگ میں ریاستی ادارے اور عوام متحد ہیں۔شاہد رند نے کہا کہ بلوچستان میں امن کے قیام اور عوام کے جان و مال کے تحفظ کے لیے کارروائیاں جاری رہیں گی، جبکہ غیر ملکی سرپرستی میں ہونے والی دہشت گردی کے خاتمے کے لیے بھرپور اقدامات کیے جا رہے ہیں۔