وزیراعظم شہباز شریف کی ترک صدر اردوان سے ملاقات، اہم علاقائی پیشرفت پر تبادلہ خیال

خانکندی /اسلام آباد (این این آئی)وزیراعظم شہباز شریف اور ترک صدر رجب طیب اردوان نے آذربائیجان میں ای سی او سربراہی اجلاس کے موقع پر ملاقات میں دوطرفہ تعلقات میں بامعنی پیشرفت کے عزم کا اعادہ کیا اور اہم علاقائی پیش رفت پر تبادلہ خیال کیا۔وزیراعظم کے دفتر سے جاری اعلامئے کے مطابق وزیر اعظم شہباز شریف کی ترکیہ کے صدر رجب طیب اردوان سے آذربائیجان کے شہر خانکندی میں 17ویں ای سی او سربراہی اجلاس کے موقع پر ملاقات ہوئی۔اعلامئے کے مطابق ملاقات میں دونوں رہنماؤں نے ترکیہ پاکستان دوطرفہ تعلقات کا جامع جائزہ لیا اور اہم علاقائی پیش رفت پر تبادلہ خیال کیا۔دونوں رہنماؤں نے پاکستان اور ترکیہ کے مابین تمام اہم شعبوں میں تعلقات میں بامعنی پیش رفت کیلئے اپنے عزم کا اعادہ کیا اور تجارت، دفاع، توانائی، علاقائی روابط اور سرمایہ کاری کے شعبوں میں تعاون کو مزید مضبوط کرنے کی اہمیت پر زور دیا۔ دونوں رہنماؤں نے اتفاق کیا کہ طے پانے والی مفاہمت کو جلد حتمی شکل دی جائے گی۔وزیر اعظم نے خطے میں امن، استحکام اور پائیدار ترقی کے مشترکہ اہداف آگے بڑھانے کیلئے ترکیہ کیساتھ مل کر کام کرنے کیلئے پاکستان کے غیر متزلزل عزم کا اعادہ کیا۔