خیبر پختونخوا حکومت کا ہیلی کاپٹر ایم آئی 17ایئر ایمبولینس میں تبدیل

پشاور(این این آئی)چیف سیکریٹری خیبر پختونخوا شہاب علی شاہ نے کہاہے کہ ہمارا بڑا ہیلی کاپٹر ایم آئی 17مکمل طور پر ایئر ایمبولینس میں تبدیل کر دیا گیا، اس سے قبل یہ ہیلی کاپٹر کرم میں میڈیکل سروسز کیلئے استعمال ہو چکا ہے۔تفصیلات کے مطابق آئی جی پولیس خیبر پختونخو اور چیف سیکرٹری نے کوہاٹی گیٹ میں سپریم کمانڈ پوسٹ کا دورہ کیا۔اس موقع پر میڈیا سے گفتگو کرتے ہوئے چیف سیکرٹری نے کہا کہ سوات واقعہ ناخوش گوار تھا لیکن 80لوگوں کی جان بھی وہاں بچائی گئی، ریسکیو 1122کو مزید جدید آلات فراہم کر رہے ہیں۔آئی جی خیبر پختونخوا ذوالفقارحمید نے کہا کہ محرم الحرام کے تمام جلوس بخیریت مکمل ہوگئے، پولیس چوکس رہی، تمام سیکیورٹی ادارے الرٹ رہے، 11ہزار سے زیادہ پولیس سیکیورٹی پر تعینات تھے۔