پارلیمانی سیکرٹری ٹرانسپورٹ میر لیاقت لہڑی سے ٹرانسپورٹ سپیشلسٹ سید حسین حیدر اور جولیا ہالنجل کی ملاقات

کوئٹہ(این این آئی)رکنِ صوبائی اسمبلی و پارلیمانی سیکرٹری میر لیاقت علی لہڑی سے پرنسپل ٹرانسپورٹ اسپیشلسٹ سید حسین حیدر اور ٹرانسپورٹ اسپیشلسٹ جولیا ہالنجل نے ملاقات کی۔ ملاقات میں بلوچستان میں ٹرانسپورٹ کے شعبے کو جدید خطوط پر استوار کرنے اور مربوط منصوبہ بندی کے تحت ترقی دینے پر اتفاق کیا گیا۔اس موقع پر سیکرٹری ٹرانسپورٹ حیات کاکڑ، ڈائریکٹر جنرل بی ٹیب ڈاکٹر سجاد اور ڈائریکٹر شکیل بلوچ بھی موجود تھے۔ ملاقات کے دوران ٹرانسپورٹ کے موجودہ نظام کو بہتر بنانے، پائیدار سفری سہولیات، اور عوامی مفاد میں جدید ٹیکنالوجی کے استعمال سے متعلق مختلف تجاویز پر غور کیا گیا۔میر لیاقت علی لہڑی نے کہا کہ صوبائی حکومت ٹرانسپورٹ کے شعبے میں اصلاحات اور ترقیاتی منصوبوں کو ترجیح دے رہی ہے تاکہ عوام کو بہتر اور محفوظ سفری سہولیات میسر آ سکیں۔ انہوں نے اس عزم کا اظہار کیا کہ متعلقہ اداروں کی مشاورت سے بلوچستان میں ایک جدید، ماحول دوست اور مؤثر ٹرانسپورٹ سسٹم قائم کیا جائے۔