14اگست کا دن نہ صرف آزادی کی عظیم نعمت کی یاد دہانی ہے، علی اصغر سیال

کوئٹہ(این این آئی) دفتر صوبائی الیکشن کمشنر بلوچستان، کوئٹہ میں یومِ آزادی کے موقع پر ایک سادہ اور پروقار تقریب کا انعقاد کیا گیا، جس میں دفتر کے تمام افسران اور ملازمین نے شرکت کی۔ اس تقریب کی صدارت صوبائی الیکشن کمشنر بلوچستان علی اصغر سیال نے کی۔تقریب سے خطاب کرتے ہوئے صوبائی الیکشن کمشنر نے 14 اگست کی تاریخی اہمیت پر روشنی ڈالتے ہوئے کہا کہ یہ دن نہ صرف آزادی کی عظیم نعمت کی یاد دہانی ہے، بلکہ ہمیں اپنے قومی فرائض، جمہوری اقدار اور آئینی ذمہ داریوں کو دل و جان سے نبھانے کا عہد بھی دلاتا ہے۔انہوں نے کہا، کہ پاکستان ہماری اجتماعی قربانیوں کا ثمر ہے، اور اس کی ترقی و استحکام کے لیے ہر شہری کا کردار نہایت اہم ہے۔ آج کے دن ہمیں یہ عہد کرنا چاہیے کہ ہم نہ صرف وطن سے محبت کریں گے بلکہ اس کی جمہوری بنیادوں کو مضبوط بنانے میں بھی اپنا مؤثر کردار ادا کریں گے۔اس موقع پر جناب علی اصغر سیال نے جشنِ آزادی کی تقریب کے کامیاب انعقاد پر متعلقہ عملے کی کوششوں کو سراہا اور ان کی کاوشوں کو خراجِ تحسین پیش کیا۔ تقریب کے دوران دفتر کے اْن ملازمین کو تعریفی اسناد اور انعامات سے بھی نوازا گیا جنہوں نے اپنے فرائض منصبی میں نمایاں کارکردگی کا مظاہرہ کیا۔تقریب کا اختتام کیک کاٹنے کی روایتی رسم سے ہوا، جس میں تمام شرکاء نے وطن عزیز کی سلامتی، خوشحالی اور ترقی کے لیے دعائیں کیں۔