جمہوری وطن پارٹی کا پینتیس واں یومِ تاسیس ملک بھر میں نہایت جوش و جذبے کے ساتھ منایا گیا

کوئٹہ(این این آئی)جمہوری وطن پارٹی کے مرکزی سیکرٹریٹ سے جاری کردہ بیان میں کہا گیا ہے کہ جمہوری وطن پارٹی کا پینتیس واں یومِ تاسیس ملک بھر میں نہایت جوش و جذبے کے ساتھ منایا گیا۔ اس موقع پر ملک کے چاروں صوبوں میں مختلف تقریبات، سیمینارز، ریلیاں اور اجتماعات کا انعقاد کیا گیا جن میں پارٹی رہنماؤں، کارکنوں اور عوام نے بھرپور شرکت کی۔مرکزی قیادت نے اپنے پیغام میں کہا کہ یومِ تاسیس صرف ایک تقریب یا روایتی دن نہیں بلکہ یہ دن نواب اکبر خان بگٹی شہید کے نظریات، جدوجہد اور قربانیوں کو زندہ رکھنے کا دن ہے۔ پارٹی رہنماؤں نے کہا کہ جمہوری وطن پارٹی نے ہمیشہ پاکستان کے آئین، جمہوریت، وفاقی طرزِ حکومت اور صوبوں کے حقوق کے لیے جدوجہد کی اور آئندہ بھی پارٹی اپنی اصولی سیاست اور عوام کی خدمت کے راستے پر ثابت قدم رہے گی۔مرکزی بیان میں کہا گیا کہ یومِ تاسیس کی کامیاب اور باوقار تقریبات کا انعقاد بتاتا ہے کہ پاکستان کے عوام نواب بگٹی شہید کے نظریے سے جڑ رہے ہیں اور جمہوری وطن پارٹی کے پرچم تلے ملک میں حقیقی جمہوریت اور انصاف پر مبنی نظام کے قیام کی جدوجہد جاری رکھنا چاہتے ہیں۔بیان میں پارٹی قیادت نے ملک بھر کے تمام کارکنان، آرگنائزرز، خواتین ونگ، یوتھ ونگ اور تمام ذمہ داران کو اس تاریخی دن کو انتہائی منظم اور خوبصورت انداز میں منانے پر دلی مبارکباد پیش کی اور اس عزم کا اظہار کیا کہ پارٹی کی یہ جدوجہد مزید منظم اور طاقتور انداز میں جاری رہے گی۔مرکزی قیادت نے کہا کہ ہم سب کو نواب اکبر خان بگٹی شہید کے افکار و فلسفہ کو مشعلِ راہ بنا کر ملک میں جمہوریت، وفاقی وحدت اور عوام کے آئینی حقوق کے تحفظ کے لیے متحد ہو کر ثابت قدم رہنا ہوگا۔