ہم سیاست کو عبادت کا درجہ دیتے ہیں،علاقے کے عوام کی بلا رنگ و نسل خدمت کر رہے ہیں میر علی حسن زہری

حب(این این آئی)صوبائی وزیر زراعت بلوچستان اور صدرِ پاکستان کے فوکل پرسن پاکستان پیپلز پارٹی برائے بلوچستان، میر علی حسن زہری نے منگل کو گڈانی کا دورہ کیا اس موقع پر علاقے کی خواتین نے صوبائی وزیر کا بھر پور استقبال کیا اس موقع پر بڑی تعداد میں خواتین نے میر علی حسن زہری کا خیرمقدم کرتے ہوئے کہا کہ وہ برسوں سے بنیادی سہولتوں سے محروم تھیں اور ان کی آواز کوئی سننے والا نہ تھا تاہم اب انہیں میر علی حسن زہری کی شکل میں امید کی کرن نظر آئی ہے۔ خواتین نے کہا کہ میر علی حسن زہری نے نہ صرف ان کے مسائل کو سنا بلکہ انہیں یہ یقین دہانی بھی کرائی کہ غریب اور محروم عوام کی آواز ایوانِ اقتدار تک پہنچائی جائے گی۔خواتین نے کہا کہ میر علی حسن زہری نے ثابت کیا ہے کہ وہ عوام کے سچے نمائندے ہیں ان کی مسلسل جدوجہد اور بے لوث خدمت کی بدولت حب اور اس کے نواحی علاقے بہت جلد پاکستان کے ترقی یافتہ شہروں کی صف میں شامل ہوں گے۔گڈانی کی خواتین نے وزیر زراعت بلوچستان کو دعا دیتے ہوئے کہا کہ اْن کی انتھک محنت، عوام دوستی اور خدمتِ خلق کے جذبے سے نہ صرف حب بلکہ پورے بلوچستان میں ترقی اور خوشحالی کے نئے دور کا آغاز ہو گا۔ خواتین کا کہنا تھا کہ دن دور نہیں جب حب پاکستان کا سب سے عظیم شہر بن کر ابھرے گا اور یہ سب میر علی حسن زہری کی انتھک کاوشوں کی بدولت ممکن ہوگا۔اس موقع پر صوبائی وزیر زراعت میر علی حسن زہری نے خواتین سے بات چیت کرتے ہوئے کہا کہ ہم سیاست کو عبادت کا درجہ دیتے ہیں اور علاقے کے عوام کی بلا رنگ و نسل خدمت کر رہے ہیں گزشتہ ادوار میں علاقے کونظر انداز کیا گیا جس کی وجہ سے علاقے کے عوام بنیادی سہولیات سے محروم ہیں ہماری کوشش ہے کہ حلقہ انتخابات کے تمام علاقوں میں یکساں بنیادوں پر ترقیاتی کام کرائے جائیں اور عوام کو بنیادی سہولیات کی فراہمی یقینی بنائی جائے اس سلسلے میں تمام دستیاب وسائل بروئے کار لائے جارہے ہیں۔انہوں نے کہا کہ خواتین نے جن مسائل کی نشاندہی ہے انشاء اللہ انہیں حل کرنے کی ہرممکن کوشش کریں گے۔