ایڈیشنل ڈپٹی کمشنر ون سکھر کی زیر صدارت ڈی سی آفس کے کانفرنس ہال میں ماہانہ ای پی آئی جائزہ اجلاس

سکھر(این این آئی) ایڈیشنل ڈپٹی کمشنر ون سکھر کی زیر صدارت ڈی سی آفس کے کانفرنس ہال میں ماہانہ ای پی آئی جائزہ اجلاس منعقد ہوا۔ اجلاس میں اسسٹنٹ کمشنر صالح پٹ ماجد ماکو، ڈسٹرکٹ ہیلتھ آفیسر سکھر ڈاکٹر علی گل شاہ، ڈائریکٹر پرائیویٹ اسکولز سکھر حمیدہ جتوئی، اسپتالوں کے میڈیکل سپرنٹنڈنٹس اور ڈاکٹرس سمیت محکمہ صحت کے دیگر افسران، پولس، ڈبلیو ایچ او و روٹری کلب نمائندگان، محکمہ تعلیم، بہبود آبادی، سوشل ویلفیئر کے افسران اور دیگر نے بھی شرکت کی۔ اجلاس میں محکمہ صحت کی ٹیموں کی گزشتہ ماہ کی کارکردگی، حاصل شدہ نتائج، درپیش مسائل اور بہتری لانے کے لیے آئندہ کی منصوبہ سازی پر تفصیلی بات چیت ہوئی۔ اجلاس کو خطاب کرتے ہوئے ایڈیشنل ڈپٹی کمشنر ون نہید احمد نے کہا کہ بچوں کو مختلف مہلک بیماریوں سے بچاؤ کے حفاظتی ٹیکے فراہم کرنا اہم فریضہ ہے، جس کی درست انجام دہی میں انتظامیہ سمیت محکمہ صحت کی ٹیموں اور والدین کا مشترکہ کردار ہے۔ انہوں نے والدین سے اپیل کی ہے کہ پیدائش سے لے کر 2 سال تک کی عمر کے تمام بچوں کو ہیپاٹائٹس بی، ڈائیریا، نمونیا، خسرہ، ٹیٹنس، پولیو اور دیگر مہلک بیماریوں سے بچاؤ کے حفاظتی ٹیکے ضرور لگوائیں۔