بیلہ بلوچی گوٹھ میں سیوریج و ٹف ٹائل منصوبے میں کروڑوں کی کرپشن کا انکشاف

لسبیلہ(بیوروچیف)بیلہ کے علاقے بلوچی گوٹھ میں ٹف ٹائل اور سیوریج کے منصوبے میں مبینہ طور پر بڑے پیمانے پر کرپشن کا انکشاف ہوا ہے۔ ذرائع کے مطابق اس منصوبے کے لیے 25 سے 30 کروڑ روپے کا فنڈ مختص کیا گیا تھا، مگر کام ناقص اور نامکمل چھوڑ دیا گیا ہے۔ سیوریج کا گندا پانی اسکول کے سامنے جمع ہے، جس سے طلبا اور راہگیروں کو شدید پریشانی کا سامنا ہے۔عوامی حلقوں کا کہنا ہے کہ چیئرمین میونسپل کمیٹی بیلہ وائس چیئرمین اور ٹھیکیدار کی ملی بھگت سے فنڈز کا ناجائز استعمال کیا گیا۔ متاثرہ شہریوں نے وفاقی وزیر نواب جام کمال خان عالیانی اور سیکریٹری پارلیمانی امور میر زرین خان مگسی سے مطالبہ کیا ہے کہ فوری نوٹس لے کر کرپشن میں ملوث افراد کے خلاف کارروائی کی جائے تاکہ عوامی پیسے کا تحفظ ممکن ہو سکے۔