لسبیلہ میں ایرانی پیٹرول کی قیمتوں میں ہوشربا اضافہ، ضلعی انتظامیہ خاموش

لسبیلہ(بیوروچیف)اسمگل شدہ ایرانی پیٹرول کی قیمتوں میں اچانک ہوشربا اضافہ ہوگیا ہے، جس پر ضلعی انتظامیہ نے مکمل خاموشی اختیار کرلی ہے۔ اوتھل اور اس کے مضافاتی علاقوں سکن آہورہ سمیت شہر بھر میں ایرانی پٹرول کہیں 245 روپے، کہیں 240 اور کہیں 235 روپے فی لیٹر فروخت ہورہا ہے۔شہری حلقوں کا کہنا ہے کہ ایرانی پمپ مالکان مکمل طور پر بے لگام ہوچکے ہیں، اپنی مرضی سے نرخ طے کرتے ہیں حالانکہ پاکستانی پیٹرول میں پانچ روپے کمی ہوئی ہے لیکن ایرانی پمپ مالکان نے کوئی بھی کمی نہیں کی بلکہ اوپر سے پیٹرول کے ریٹ بڑھادئیے ہیں اور عوام کو مہنگے داموں پیٹرول خریدنے پر مجبور کیا جا رہا ہے۔ اسمگل شدہ تیل ہونے کے باوجود اس پر کسی قسم کی حکومتی نگرانی یا قیمتوں پر کنٹرول موجود نہیں۔ہریوں نے شکایت کی کہ ضلعی انتظامیہ مکمل طور پر بے بس یا ملوث دکھائی دے رہی ہے، نہ کوئی چھاپہ، نہ کارروائی، نہ پوچھ گچھ۔عوامی حلقوں نے حکام بالا سے فوری نوٹس لینے اور ایرانی پیٹرول کی قیمتوں پر کنٹرول، پمپ مالکان کے خلاف کارروائی کا مطالبہ کیا ہے۔